شەفەق نیوز/ نێچیروان بارزانی سەرۆک هەرێم کوردستان، دووپات لە پشتگیریکردن تەواوی ئەرا سەرکەفتن پرس ئاشتی لە تورکیا کرد، وتیش؛ جەنگ و چەک هویچ گیچەڵیگ چارەسەر نیەکەن.

  قسەیل نێچیروان بارزانی سەرۆک هەرێم کوردستان مەوقەی پیشوازیکردن لە شاند ئیمرالی هات کە سەردان هەرێم کوردستان کەێد، ئەرا باسکردن لە دووارە دەسەوکاربوین لە پرس ئاشتی لە تورکیا.

 سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: سەرۆک نێچیروان بارزانی لە گردەوبوینەگە دووارە پشتگیریکردن تەواوی ئەرا سەرکەفتن پرس ئاشتی لە تورکیا نووەو کرد، و دووپات کرد کە ئی کارە دەرفەتیگ میژوویی گرنگە بایەسە کار ئەرا سەرکەفتنی بکریەێد و پتەوکردن برایەتی ناوەین کورد و تورک، چوینکە ئاشتی ئەرا گشتی گرنگە لە تورکیا و ناوچەگە.

 سەرۆک نێچیروان بارزانی وتیش: لە هەر لە سەرەتاوە، هەمیشە کار کردیمن ئەرا ئەوە کە پرس ئاشتی بوودە هەلوژاردەیگ ستراتیژی، و بایەسە باوەتەیل وە شیوەی ئاشتیانە چارەسەر بکریەن، چوینکە ئەزموون ئەوە چەسپان کە جەنگ و چەک نیەتوەنن هویچ گیچەڵیگ چارەسەر بکەن، و باس ئومیدی کرد کە پەکەکە وەرەو ئی پرسە وە نووڕین ستراتیژی رەفتار بکەێد، و هوشداری لە گوماکردن ئی دەرفەتە دا.

 لەلای خوەییش، شاند ئیمرالی سڵاو و ڕێز لە عەبدولڵا ئۆجەلان رەسانە سەرۆک نێچیروان بارزانی، و ئافەرین لەو گامەیلە کرد کە لەی باوەتە جیوەجی کریانە.

 شاندەگە رێز خوەی ئەرا تەقەلایل سەرۆک بارزانی لە پشتگیریکردن تەقەلایل ئاشتی لە ئیسە و ئەوسا پیشکەش کرد، و داوای وەردەوامیی لە پشتگیریکردن و سەرکەفتن پرسەگە کرد.