ئەوەیش مەوقەی چەوپیکەفتنی لە ژەنیڕاڵ ماسیوە ماکفارلان فەرماندەی هیزەیل هاوپەیمان ناودەوڵەتی لە عراق و سوریا هات.
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: لەو گردەوبوینە ک شێخ جەعفەر شێخ موستەفا جیگر سەرۆک هەرێم کوردستان، و گەورە وەرپرسەیل وەزارەت کاروبار پیشمەرگە ئامادەی بوین، باس گامەیل چاکسازی و وەیەککردن هیزەیل پیشمەرگە، و دویاترین نووەوبویەیل جەنگ دژوە تیرۆر و هەماهەنگی ناوبەین هیزەیل پیشمەرگە و سوپای عراق لە نواگردن تیرۆر کریا.
وەگەرد نیشاندان سوپاس و رێز ئەرا پاڵپشتیکردن ئەمریکا و هاوپەیمان ناودەوڵەتی وە هیزەیل پیشمەرگە و سوپای عراق، سەرۆک نێچیروان بارزانی دووپات کرد ک وەزارەت کاروبار پیشمەرگە پابەندە و هەر لە چاکسازی و رێکخستن و وەیەککردن هیزەیل پیشمەرگە وەردەوامە، و ئەوەسا کار ئەرا سەرکەفتن ئی کارە کەێد، لەبان ریکری و گرفتەیل، هەمیش سوپاس لە ئەمریکا و ئەو دەوڵەتەیل برادەرە کرد ئەرا دەسمیەتییان و پاڵپشتیکردن ئی کارە.
وەگورەی بەیاننامەگە، هەردوگ لایەنەگە هاوڕا بوین ک هیمان داعش هەڕەشەیگ راسی لەبان ئاسایش و ئارامی لە عراق و سوریا دیرێد، و لەی باوەتە دووپات لە گرنگی وەردەوامبوین پاڵپشتیکردن هاوپەیمان ناودەوڵەتی و ئەرکەیلی لە عراق و هەرێم کوردستان کرد و هاوکاری و هەماهەنگی ناوبەین هیزەیل پیشمەرگە و سوپای عراق لە نواگردن تیرۆر و لەناوبردن یەکجاری داعش.
پەیوەندیەیل هەولێر و بەغدا، رەوشەیل کامپ هۆل لە سوریا، و دویاترین گەشەیل ناوچەگە، باسەیلیگ لەناو ئەو گردەوبوینە بوین.