شەفەق نیوز/ لە چوارچێوەی بەشداریکردنی لە کۆنفرانس ئاسایش میونشن، سەرۆک نێچیرڤان بارزانی، سەرۆک هەرێمی کوردستان، شەوەکی ئمڕوو جمعە، وەگەرد گویدۆ کرۆسێتۆ، وەزیر وەرگری ئیتاڵیا گردەو بوی. سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: لە دیدارەگە هەردوگلا باس لە پەیوەندییەیل ناوەین هەرێم کوردستان و ئیتاڵیا و بەرزکردن هاریکاری هاوبەشی ناوەین هەردوگلا و نواگیریکردن هەڕەشەیل داعش کردن.
وەگورەی بەیاننامەگە، سەرۆک نێچیرڤان بارزان سوپاس هەرێم کوردستان ئەرا ئەو پاڵپشتی ئیتاڵیا لە بوار مەشقکردن هیز پێشمەرگە و بەرزکردن توانایان لە چوارچێوەی هاوپەیمان ناودەوڵەتی دژ وە داعش کرد، دووپات لە خوازین عراق و هەرێم کوردستان کرد ئەرا وەردەوامی پاڵپشتی ناودەوڵەتی ئەرا لەناوبردن کۆتایی داعش.
لەلای خوەییش وەزیر وەرگری ئیتاڵیا دووپات لە گرنگی هاوبەشی وەرد هەرێم کوردستان و پابەندبوین وڵاتەگەی کرد ئەرا وەردەوامبوین لە پاڵپشتیکردن پیشمەرگە و بەرزکردن هاریکاری سەربازی و ئەمنی وەرد عراق و هەرێم کوردستان و دەسخوەشی لە ڕۆڵ هەرێم کوردستان کرد لە مقیەتیکردن سەقامگیری لە ناوچەگە.
دویاترین پیشهاتەیل ئەمنی و سیاسیی عراق و ناوچەگە، وەتایبەتی رەوش سوریا و بڕیگ باوەت جی گرنگیدان هاوبەش، باسایل دیکەی ناو دیدارەگە بوین.
ئیوارەی دویەکە پەنجشەممە، نێچیرڤان بارزانی، سەرۆک هەرێم کوردستان ئەرا بەشداریکردن لە کۆنفرانس ئاسایش میونشن رەسیە ئەڵمانیا.
کۆنفرانسەگە وە بەشداری شمارەی فرەیگ لە سەرۆک دەوڵەت و حکومەت و وەزیرەیل دەیشت و وەرگری بڕیگ نوخبەی شارەزا و بڕیاردەرەیل لە سیاسەت و دیپلۆماسی و ئاسایش ناودەوڵەتی وەڕیەو چوود.
سەرچەوەیگ لە سەرۆکایەتی هەرێم کوردستان ئەرا ئاژانس شەفەق نیوز وت: سەرۆک نێچیرڤان بارزانی لە ئەنجام مکیسیگ تایبەت کۆنفرانسەگە بەشداری کەێد، و ئەوەیش لە چوارچیوەی تەقەلایلی ئەرا قایمکردن پەیوەندییەیل ناودەوڵەتی هەرێم کوردستان، و رووشنایی بخەێدە بان ئاستەنگەیل ئەمنی و سیاسی لە وەردەم هەرێم کوردستان و عراق وە گشتی.
بڕیارە سەرۆک هەرێم زنجیرەیگ دیدار وەرد شمارەیگ سەرکردە و وەرپرس هەرێمی و ناودەوڵەتی ئەنجام بەێد، لەبان پرسەیل ئاسایش و سەقامگیری ناوچەگە، و جەنگ تیرۆر، و باس شیوەیل بەرزکردن پەیوەندییە دووانیەیل ناوەین هەرێم کوردستان و وڵاتەیل بەشداربویی کۆنفرانسەگە بکریەێد.
سەرۆک نێچیرڤان بارزانی، وەرجەیە بەشداری دانیشتنەیل وەرین کۆنفرانسەگە کردیە، کە لەناوی دووپات لە گرنگی خەسەوکردن تەقەلایل ئەرا مقیەتیکردن رەوشەیل ئەمنی ناوچەگە، و بەرزکردن هاوکاری سیاسی و ئابووری لە بەرژەوەنی گەلەیل ناوچەگە و عراق وە گشتی.
کۆنفرانس ئاسایش میونشن یەکیگە لە دیارترین کۆڕبەندە ساڵانەیەیل جیهان، کە وەرپرسەیل باڵای حکومەت و شارەزایەیل بوار وەرگری و ئاسایش و سیاسەت دەیشت گردەو کەێد.
هەرلیوا، لە کۆنفرانسەگە باس لە ئاستەنگەیل ئیسە لە وەردەم کۆمەڵگەی ناودەوڵەتی کریەێد، لەوانە پرسەیل تیرۆر، جەنگەیل چەکداری، بڵاوبوین چەک، ئاڵشتبوین کەشوهەوا و کاریگەرییەیلی لەبان ئاسایش جیهانی.
یەکەم دانیشتنەیل کۆنفرانسەگە لە ساڵ ١٩٦٣ لە ژیر ناو "گردەوبوین زانستەیل وەرگری" وەڕیەو چگ، کە ئمجا بویە یەکیگ لە گرنگترین سەکووەیل ناودەوڵەتی ئەرا گفتوگۆکردن لەبان پرسە ئەمنییەیل و سیاسییەیل.
نێچیرڤان بارزانی وەرجەیە بەشداری دانیشتنەیل وەرین کۆنفرانس ئاسایش میونشن کردگە، لەو ماوە بڕیگ دیدار گرنگ وەرک سەرکردە ناودەوڵەتییەیل و کەسایەتییە دیارەیل بوارەیل سیاسەت و دیپلۆماسی ئەنجام دا.
لەو بەشداریەیلە بارزانی باوەتەیلیگ پەیوەست وە قەوارەی هەرێم کوردستان لە چوارچێوەی عراق و ناوچەگە خستە وەردەس، لەوانە گفتوگۆ وەرد حکومەت فیدراڵی لە بەغدا و ئاوەدانکردن و بەرزکردن دەرفەت بەرهەمهاوردن ناودەوڵەتی.
دیدارەیل وەرین لە پەراوێز کۆنفرانسەگەیش بەشداربوین لە فراوانکردن پەیوەندییەیل دەیشت هەرێم، چ لە ئاستی سیاسی و چ لە ئاست ئابووری، و دەرفەت نیشاندان دیدگای هەرێم کوردستان لە چارەسەرکردن کێشەیل هەرێم و ڕۆڵی جویر هاوبەشیگ گرنگ لە هاوپەیمان ناودەوڵەتی دژ تیرۆر دروس کرد.