شەفەق نیوز/ نێچیروان بارزانی سەرۆک هەرێم کوردستان، ئمڕوو سێشەممە، دووپات لەبان گرنگی لەیەکفامستن سیاسی کرد ئەرا دروسکردن حکومەت هاتگ کوردستان، دویای راگەیانن ئەنجامەیل هەڵوژاردن بیس و سێەی تشرین دویەم.
بڕیارە سوو چوارشەممە، کۆمسیۆن باڵای سەروەخوەی هەڵوژاردن ئەنجامە کۆتاییەیل هەڵوژاردن پەرلەمان کوردستان راگەینێد.
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: نێچیروان بارزانی سەرۆک هەرێم کوردستان، دویای نیمەڕو ئمڕوو، پیشوازی لە ئیلینا رۆمانۆڤیسکی خانمە باڵیۆز ئەمریکا لەلای عراق کرد، و باس هەڵوژاردن پەرلەمان کوردستان و ئەنجامەیلی لەناو دیدارەگە کریا، کە رۆمانۆڤیسکی پیرووزبایی لە سەرۆک نێچیروان بارزانی و گەل کوردستان وە سەرکەفتن هەڵوژاردنەگە کرد.
لەی باوەتە، هەردوگ لایەن دووپات لەبان گرنگی لەیەکفامستن ناوەین لایەنەیل سیاسی کردن ئەرا دروسکردن حکومەت، و لە دیدارەگە هەمیش باس پەیوەندییەیل ناوەین حکومەت هەرێم کوردستان و حکومەت فیدڕاڵی کریا، و تەقەلایان ئەرا چارەکردن گیچەڵەیل.
هەردوگ لایەن دەسخوەشی لە وەردەوامی دانوسەنین کردن ئەرا چارەکردن باوەتەیل لەڕی لەیەکفامستن، و هاوڕا بوین کە چارەکردن باوەتەیل ناوەین هەولێر و ئارامی وڵات قایمەو کەێد.
لەلاییگ ترەک لە دیدارەگە، رووشنایی خریا بان دویاترین گەشەیل خوەرهەڵات ناوڕاس، کە دووپات لەبان گرنگی کارکردن گشتگیر لە ناوچەگە کردن، ئەرا مقیەتیکردن ئارامی و نەهیشتن فراوانبوین ئاڵووزیەیل.
دووپاتیش کردن لەبان گرنگی مەنین عراق دویر لە جەنگ و کێشەیل ناوچەگە.
لە دیدارەگە باس پەیوەندییەیل ئەمریکا وەگەرد عراق و هەرێم کوردستان و باوەتەیلیگ ترەک کریا، کە گرنگی هاوبەش دیرن.