شەفەق نیوز/ سەرۆک هەرێم کوردستان نێچیروان بارزانی، ئمڕوو پەنجشەممە، دووپاتکرد لە خواست هەرێم کوردستان لە فراوانکردن هاوکاری وەگەرد ئەڵمانیا.
یەیش لە دیداریگ شەوەکی ئمڕوو هاتیە توبیاس لیندنر وەزیر وڵاتەگە لە وەزارەت دەرەوەی ئەڵمانیا و هەماهەنگکار وەزارەت دەرەوەی ئەڵمانیا تایوەت وە کاروبار سوریەیل و و شاند یاوەری.
سەرۆکایەتی هەرێم لە بەیاننامەیگ راگەیان، لە میانەی دیدارەگە گفتوگو لەبان ئەوزەڵکردنەیل پەیوەنی ئەڵمانیا وەگەرد عراق و هەرێم کوردستان و پەیوەنی هەولێر و بەغداد کریا، وەگەرد هەڵوژاردن پەرلەمان و بارودۆخ عراق و هەرێم کوردستان، و ئەوزەڵکردنەیل سوریا دویا پیشهاتەیل خوەرهەڵات ناوڕاس.
وەپای بەیاننامەگە، سەرۆک نێچیروان بارزانی دەسخوەشی لە ئەڵمانیا کرد لەبان پاڵپشتیکردن وەردەوامەیلی ئەرا عراق و هەرێم کوردستان لە مژار سەربازی و سیاسی و مرۆیی دووپاتکرد لەبان ئەوەگ هەرێم کوردستان دوس دیرێد هاوکاری وەگەرد ئەڵمانیا فراوانتر بکەێد یا کارکردن لە گشت مژارەیل.
لای خوەیەو وەزیرە ئەڵمانیەگە خوەشی خوەی نیشاندا لە پرۆسەی دەنگداین لە هەڵوژاردن پەرلەمان کوردستان و بەشداری بەرزیگهەوڵاتیەیل لەلی، هەمیش ئەو تەقەلایەیلە ئەرا پێکهاوردن حکومەت نوو دریایە.
ئەوەگ پەیوەنی وە بارودۆخ ناوچەگە بیاشتوود، هەردوگ لا دووپاتکردن لەبان گرنگیپاراستن ئاشتی و بی وەیی و هاوکارەیی گشت لایەنەیل ئەرا دویرەوخسن ناوچەگە لە گیچەڵەیل فرەتریگ، وەپای بەیاننامەگە.