سەرۆک نێچیروان بارزانی لە بەیاننامەیگ وت؛ " ئمڕوو یاد سی و شەش ساڵەی هەڵمەتە بەدناوەگەس کە زیاتر لە  182  هەزار مناڵ و ژن و پیاو و گەنج کوردستان بوینە قوربانی، کە وە یەکیگ  لە بەدترین تاوانەیل و جینۆساید  دانرێد لەمێژوو، لە ساڵ 1988 وەبان دەس رژێم بەغداد شەهید کریان، لێکەفتەیل ئەو هەڵمەتە تائیسە وەردەوامە، لەی یادە  وە رێز و شکۆداری یادیان کەیمن سەر رێز ئەرا گیان پاکیان چەمنیمن".

وتیش "دادگای فیدڕاڵی باڵای تاوانەیل عراق ئێ تاوانە جویر تاوان جینۆساید ناسان، باوجی داواکاریمان لە حکومەت فیدڕاڵی عراق نووەوکەیمن ئەرا وەجی رەسانن دادپەروەری  و قەرەبویکردن قوربانیەیل وەگشت جویریگ، و دووپاتکرد  خزمەتیگ خاستر پیشکەش وە کەسوکار  قوربانیەیل ئەنفال کەێمن لە گشت  مژارەیلە و بایەد درێغی وەرانوەریان نەکرێد".

سەرۆک هەرێم کوردستان وتیش "کەسوکار بەرێز قوربانیەیل ئەنفال دڵنیاکەیمن تا کۆتایی پرۆسەی مینەکردن روفات شەهیدەیل گلەوداینیان ئەرا  باوەش نیشتیمان وەردەوام بویمن" دووپاتکرد "کار و تەقەلای هەمەلایەنە کەیمن  ئەرا دان دانان وە تاوان ئەنفال جویر تاوان جینۆساید لەبان ئاست ناودەوڵەتی و دوارەنەوین تاوانیگ جویر یە لە هەر شوینیگ جەهان". 

دووپاتکرد "لەی یادە دووپاتکەیمن لە تەبایی و وەگەرد یەک بوین گشت لایەنە و پێکهاتەیل کوردستان، کە مەرج پێویستیگە ئەرا پاراستن و مەنن ماف و دەسکەفتەیل و فیدڕاڵیەت و قەوارەی دەستوری هەرم کوردستان".