شەفەق نیوز/ نێچیروان بارزانی سەرۆک هەرێم کوردستان، ئمڕوو یەکشەممە، بەیاننامەیگ وەبوونەی ٦١مین ساڵیاد شۆڕش ئەیلوول گەل کورد دژوە رژیم وحکومەتەیل وەرین عراق دەرکرد، دووپات لە مقەیەتیکردن ماف و دەسکەفتەیل دەستووری هەرێم کوردستان و بتەوکردن سیستەم فیدراڵی لە گشت وڵاتەگە کرد.
سەرۆک بارزانی لە بەیاننامەگە وت: ئمڕوو وە ڕێز و شانازی پیشوازی لە شەس ویەکەمین ساڵیاد شۆڕش پیرووز ئەیلوول، و بارزانی نەمر ریبەر شۆڕشەگە و هاوڕیەیلی وگشت ئەو پاڵەوانەیلە کەیمن ک گیان خوەیان کردنە قوربانی ری ئازادی گەل و نیشتمانیان، و سڵاو لە خیزانە بەڕێزەیل شەهیدەیل وگشت پێشمەرگە وخەباتکارەیل ک رەنج دان و خزمەتیان وگشت دڵسووزییگ وە درویژی رووژە سەختەیل شۆڕشەگە پیشکەش کردن.
وتیش: شۆڕش ئەیلوول گلەوداین ناسنامەی نەتەوەیی و نیشتمانی ئەرا گەل کوردستانە، ک شۆڕش گشت چینەیل وپیکاتەیل بوی ک لەژیر سای یەک سەرکردایەتی و ڕیبەری گردەو بوین، ک لە یەکیگ لە سەختترین قوناغەیل میژوو گەل کوردستان و ناوچەگە، شۆڕشەگە نواگیری دوژمنەیل گرد وە باوەڕی سەخت وقایمیگ، ئەوە بوی ک ناچار دەوڵەت عراقی کرد دان وە مافەیل گەل کوردستان بنەێد ک بویە بنەڕەتیگ ئەرا گشت ئەو دەسکەفتەیلیە.
سەرۆک هەرێم کوردستان وتیش: لەناو ئەو نموونەیلە ک لە شۆڕشەگە بوینە ئەنجام، ئەوەسە ک بوغرایی نەگردەی وەو سەرکەفتنەیلە ک ئەنجامیان دا، وەلێ سەرکەفتنەیلی کردە دەرفەتیگ ئەرا بتەوکردن وەخشین و خەبات هاوبەش و قایمکردن ماڵ کوردستانی.
بارزانی هەمیش وت: شۆڕش ئەیلوول ئەرا برادەر ودوژمنەیل وگشت جەهان ئەوە چەسپان ک هویچ هیزیگ سەربازی نییە بتوەنێد خوازین گەل کوردستان ئەرا ژیان و ئازادی بشکنێد، ک نهێنی سەرکەفتن شۆڕشەگە وهیزەگەی ها یەکگردن و یەکڕزی گشت پیکاتەیل گەل کوردستان.
سەرۆک نێچیروان بارزانی دووپات کرد لەبان یەکڕزی و یەکگردن وکار هاوبەش ناوبەین گشت پیکاتەیل و هیزەیل سیاسی کوردستانی، ک یە تەنیا رییگە ئەرا مقەیەتیکردن مافەیل و دەسکەفتەیل دەستووری هەرێم کوردستان و بتەوکردن سیستەم فیدراڵی و مسۆگەرکردن دویارووژیگ خاستر.