شەفەق نیوز/ نێچیروان بارزانی سەرۆک هەرێم کوردستان،  ئمڕوو یەکشەممە،  داوای دووارە نووڕستن راسییگ کرد ئەرا کەرت پەروەردە و خوەنەواری لە هەرێم،  وبکەفێدە بەڕنامەی چاکسازی حکومەتی. 

سەرۆک بارزانی لە وتاریگ لە گردەوبۊن سیستەم پەروەردە ک زانکۆی ئەمریکی لە دهۆک ڕێکی خەێد، وت: کەرت پەروەردە خوەی بنەمای دروسکردن هەر کۆمەڵگایگە لە جیهان، و جەخت کرد ک سیستەم پەروەردە و خوەنەواریە هەر لە قۆناغ ساوایان تا رەسێدە ناوەندی و خوەنستن باڵا، دووارە نووڕستن راسییگ خوازێد، و بایەتە بکەفێدە چاکسازی حکومەتی وەگورەی پەیمانەیل ناودەوڵەتی. 

وتیش؛ گەشەکردن زانیاری ئە تەکنەلۆژیا فرە وەزۊی ڕی کەێد، و ئەگەر وەپیا نەڕەسیمن ل، هەر وەشیوەی خراویگ لە شۊن خوەمان مینیمن ، و جەخت کرد لە گرنگی ئاسانکردن سەختی و ریگریەیلە ک کەفنە وەر پەروەردە و خوەنەواری. 

و دووپات کرد ک خوەنەواری هاوکاری لە دابینکردن دەرفەتەیل کار کەێد و ئاست پەیوەندیەیل بازرگانی و ئابووری وەرد دەوڵەتە پیشکەفتگەیلە بەرزەو کەێد. 

سەرۆک هەرێم،  جەخت لە گرنگی ئەوە کرد ک گشت قۆناغەیل خوەنەواری تەواو یەکتر بکەن، ووت: خوەنەواری گەشەپێدان وەردەوام خوازێد،  ئەوەیش لە وەکارهاوردن زوان ئینگلیزی لە بەرنامەیلە، وئەو زوانە جیهانیەوە. 

نێچیروان بارزانی باس گرنگی گریەداین بازاڕ کار و بازرگانی لە هەرێم لەڕی واز کردن ناوەند و پەیمانگایل پیشەیی کرد. 

هەمیش وت؛ نەبایەت خوەنەواری تەنیا لەبان گەشەکردن تەکنەلۆژیا و زانیاری بوود، باوجی بایەتە پەروەدە  لە چین مرۆیی و بیناکردن ئینسان بوود لە ڕی سوودگردن لەو سامان ئەدەبی و عیرفانی فرە ک لەلای شاعرەیل کورد هەس.