شەفەق نیوز/ نێچیروان بارزانی سەرۆک هەرێم کوردستان، ئمڕوو یەکشەممە، بڕیار دیداریگ ناوەین خوەی و شاند ئیمرالی ئەرا سوو دووشەممە ئاشکرا کرد، کە ئەو شاندە پەیامیگ لە عەبدولڵا ئۆجەلان ریبەر پەکەکە هاوردیە.

نێچیروان بارزانی لە وتاریگ لەناو کۆنفرانس ئاسایش میونشن لە ئەڵمانیا وت: شاند ئیمرالی ئەرا هەولێر هاتگە، و ئەوەسا چوودە سلێمانی، و ئیمە چەوەڕی باوەت ئەو پەیامە کەیمن، و مەزەنە کەیمن پەیام ئاشتی بوود.

سەرۆک نێچیروان بارزانی وتیش: ئومید دیریمن پەیام ئاشتی لە ئۆجەلان بشنەویم، و ئومید خوازیمن پەکەکە وە سڵای ئی پەیامە بکەێد.

 لەباوەت سوریا، نێچیروان بارزانی وت: فرە دڵم ئەرا قامیشلۆ و دیمەشق قرچێد، و ئارەزوو دیرم رووژیگ سەردان ئی شارەیلە بکەم، هەمیش حەلەب و عەفرین.

 وەرجەیە، مەسعود بارزانی سەرۆک پارت دیموکرات کوردستان، لە سەیرانگای سەڵاحەدین چەوی کەفتە شاند ئیمرالی وە سەرۆکایەتی بروين بولدان، کە بای رەوشەیل سیاسی و کار ئاشتی لە تورکیا کریا، وەگەرد هویردەکاریەیل گردەوبوین شاندەگە وەرد ئۆجەلان.

مەسعود بارزانی لە دیدارەگە وت: کار ئاشتی گرنگە، و بایەسە هاوکاری ناوەین گشت لایەنەیل بکریەێد ئەرا سەرکەفتنی، و من ئامادەم ئەرا پشتگیریکردن ئی تەقەلایلە.

  شاند "ئيمرالي" گروپیگە لەو سیاسەتمەدار و کەسایەتیەیلە کە سەردان عەبدولڵا ئۆجەلان ریبەر پەکەکە کردیاد لە زیندان ئیمرالی لە تورکیا، کە لە ساڵ 1999ەو سزای زیندانیکردن هەمیشەیی وەسەر بەێد.