شەفەق نیوز/ نێچیروان بارزانی سەرۆک هەرێم کوردستان، ئیوارەی ئمڕوو چوارشەممە، پیشوازی لە گەشەیل سیاسی لەباوەت کوردی لە تورکیا کرد.

بارزانی لە وتاریگ لەناو کۆنگرەیگ ئەرا دامەزراو خوەرهەڵات ناوڕاس ئەرا توێژەرەیل (میری) وت: لە وەخت دەسکردن حکومەت تورکی ئیسە وە ئەرکەیلی، گەشەیل فرەیگ لە باوەت کورد بوی، و ئیمە لە هەرێم کوردستان خوەشاڵ بویمن ئەگەر ئاشتەوایی لە تورکیا بوی.

وتیش: چارەکردن باوەت کوردی نەک تەنیا دەسمیەتی تورکیا دەێد، بەڵکم دەسمیەتی ناوچەگە وەگشتی دەێد، ئەراوە بایەسە نواگیری لە تەقەلایل شکستهاوردن وەی کارە بکریەێد، و ئەو پەلامارە کە لە ئەنقەرە روی دا ئەرا شکستهاوردن ئی تەقەلایلە بوی.

بارزانی دیاری کرد کە پەکەکە گیچەڵ گەورەیگ دروس کەێد، نەک تەنیا ئەرا تورکیا، بەڵکم ئەرا ئیمەیش، چوینکە هویچ چشتیگ ئەرا دامودەزگایل هەرێم نەنانە، و بایەسە واز لەی رەفتارەیلە بارێد ئەگەر بخوازێد پشتگیری ئاشتی بکەێد لە تورکیا، و بایەسە وە سیاسەت نوویگ بچوودە ری.

بارزانی هوشداری کرد کە باوەت کوردی لە عراق جیاوازە لەوەگ لە تورکیا و سوریا و ئیران هەس، و ئیمە پشتگیری لە پەیاکردن چارەسەرییگ ئەرا ئی باوەتە لەی دەوڵەتەیلە کەیمن.

دووپاتیش کرد کە ئیمە پشتگیری لە چارەکردن گیچەڵەیل وەڕی دانوسەنین کەیمن، و براو نەیریمن کە چەک و ئۆپراسیۆنەیل سەربازی گیچەڵەیل چارەسەر کەن.