ئەوەیش مەوقەی چەوپیکەفتنی وەرجە نیمەڕو ئمڕوو، وەگەرد ئەنالینا بێربوک خانمە وەزیر دەرەوەی ئەڵمانیا، ک ئیرنگە سەردان هەولێر کەێد، وەگورەی بەیاننامەیگ لە سەرۆکایەتی هەرێم کوردستان.

بەیاننامەگە وتیش: لە دیدارەگە، سەرۆک نێچیروان بارزانی سوپاس لە پاڵپشتیکردن سەربازی و مرۆیی و سیاسی ئەڵمانیا ئەرا عراق و هەرێم کوردستان کرد، و دووپات کرد ک هیمان هەڕەشەی تیرۆر وەردەوامە، ئەراوە عراق و هەرێم کوردستان وەردەوامی لە پاڵپشتیکردن ئەمریکا و کۆمەڵگای ناودەوڵەتی خوازێد.

 لەلای خوەییش، بێربوک دووپات کرد ک ئەڵمانیا وە گرنگی نووڕێدە پەیوەندیەیلی وەگەرد عراق و هەرێم کوردستان، و قایمکردن ئاشتی و ئارامی سیاسی و ئابووری لەناویان، و لەی باوەتە، باس گرنگی جیوەجیکردن رێککەفتن ناوبەین حکومەت هەرێم کوردستان و حکومەت فیدڕاڵی لە گونجانن رەوشەیل لە شنگال، ک هیلێد ئاوارەیل ئەرا میلکان خوەیان گلەو بخوەن، و ناوچەگە دووارە ئاوەدان بکریەێد.

پەیوەندیەیل هەولێر و بەغدا باوەتەیگ لەناو ئەو دیدارە بوی، ک سەرۆک نێچیروان بارزانی باس هەسی کەشوهەوای گونجیاییگ لەناوبەین هەردوگ لایەنەگە ئەرا چارەکردن گرفتەیل کرد، هەمیش هەماهەنگی قایمیگ ناوبەین عراق و هیزەیل پیشمەرگە ئەرا نواگردن داعش.

 پەیوەندیەیل عراق و هەرێم کوردستان وەگەرد دەوڵەتەیل هاوسا، و رەوش ئاوارەیل و پەنابەرەیل لە هەرێم کوردستان، و رەوش شنگال و ئێزدیەیل وەشیوەی گشتی، و بڕیگ باوەت ک خاوەن گرنگیین، باسەیل ناو ئەو دیدارە بوین.

سەرۆک نێچیروان بارزانی، سوپاس لە ئەڵمانیا کرد ئەرا پاڵپشتیکردنی و هاوکاریی وەگەرد ئێزدیەیل، و ناسانن ئەوەگ وەسەریان هات وە تاوان جینۆساید لە پەرلەمان ئەڵمانیا.