شەفەق نیوز/ سەرۆک هەرێم کوردستان نێچیروان بارزانی، ئمڕوو دووشەممە، یاد لە سێدارەداین خانمە کورد فەیلی لەیلا قاسم کرد و دووپاتکرد کە ژنیگ ئازاد و خوەراگر بویە.

نێچیروان بارزانی لەبان پێگەی ئێکس نویسانیە " لەیاد شەهیدبوین لەیلا قاسم و هاوڕیەیلی، وە گشت رێز و بی دوو دڵیگ یاد ئازایی و قوربانیدانی کەیمن لە پێناو ئازادی کوردستان و کەرامەت گەلەگەی".

وتیش: "ئو هێمای ئیرادەی ژن ئازادیگ  کوردە دەنگ وەرگیریکردنە وەرانوەر وە ستەم و دەنگیگە لە هویرەو نیەچوود و وە زینگی مینێد  لە ویژدان گشت کوردستانیگ تا هەمیشە".

ماڵ کورد فەیلییەیل، رووژ شەممەی گوزەشتە ساڵیاد پنجا و یەکساڵەی لە سێدارەداین چالاکوان فەیلی لەیلا قاسم کرد لە شار هەولێر پایتەخت هەرێم کوردستان.

لەیلا قاسم، سیاسەتمەداریگ کورد فەیلی بوی لە شار خانەقین لە 27 کانون دویەم ساڵ 1952 لەداڵگ بویە، وەگەرد پارت دیموکرات کوردستان کار کرد لە سەرەتای ساڵ هەفتایەیل سەدەی گوزەشتە.

دەسکردە خوەنستن لە زانکۆ لە کۆلێژ ئاداب زانکۆی بەغداد بەش زانست کۆمەڵناسی لە ساڵ 1971 و لە 29 نیسان ساڵ 1974 وەلایەن حکومەت عراقی دەسگیرکریا و 12 ئایار 1974 لە سێدارەیدان.