شەفەق نیوز - هەولێر
نێچیرڤان بارزانی سەرۆک هەرێم کوردستان، رووژ چوارشەممە، دووپات لەبان وەردەوامبۊن پاڵپشتی ئێزدییەیل و پاراستن ماف و ناسنامەیان کرد، لە وەختیگ دەسنشان ئەرا وەردەوامبۊن تەقەلاگان کرد ئەرا ئازادکردن رفیاگەیل و ئاشکراکردن چارەنویس بیسەروشوینەیل، و وەدیهاوردن دادپەروەری ئەرا رزگاربۊیل لە تاوانەیل ریخریاگ داعش.
یەیش لە وتاریگ هات کە دڵشاد شەهاب یاریدەدەر سەرۆک هەرێم کوردستان، لەجیای بارزانی، لەناو رێوڕەسم راگەیانن "تووڕ هەڵسیان رزگاربۊیل" ئێزدییەیل پیشکەشی کرد، کە شەوەکی ئمڕوو لە هەولێر وەڕیەو چگ، وە ئامادەبۊن وەرپرسەیل و کەسایەتییەیل لە ناوخۆ و دەیشت هەرێم کوردستان.
بارزانی لە وتارەگەی کە رەسیە ئاژانس شەفەق نیوز وت، کە رێوڕەسمەگە کوڵ نیەود لەبان زینگکردن یاد جینۆساید و ئەو تاوانەیلە کە ریخریاگ "داعش" وەرانوەر هاووڵاتییە ئێزدییەیل ئەنجامیان دا، بەڵکم لە سەرەتاییگ نوو ئەرا رزگاربۊیل تیەێدە دی، کە رەنگدانەوەی ئیرادە و رکداری لەبان بیناکردن ژیانیگ خاستر و ئایندەیگ ئارامتر.
وتیش کە ئێزدییەیل چەسپانن وە وەرگەگردن و ئازایەتییان، کە تیرۆر، وەگەرد تاوانەیل و دڕندەیی، نەتۊنست ئیرادەیان بشکنێد یا کۆتایی وە ئومیدیان لە ژیان بارێد، وە دووپاتکردن پابەندبۊنیان وە گلەوهاوردن مافەیلیان و بیناکردن بانانیگ خاستر ئەرا خوەیان و مناڵەیلیان.
دەسنشان ئەرا ئەوە کرد کە راگەیانن "توڕ هەڵسیان رزگاربۊیل لە گامیگ گرنگ وەرەو قۆناغیگ تیەێد دی کە رزگاربۊیل خوەیان خاوەن دەسپێشخەری و دەنگ کاریگەر بوون لەو دۆسیە و بڕیارەیلە کە پەیوەندی وە مافەیلیان و ئایندەیانەو دیرن"، وە دەربڕین "پاڵپشتیی ئەرا ئامانجەیل توڕەگە".
یەیش وە دەرفەتیگ دانێد ئەرا وەهیزکردن هاوکاری و هاوپشتی لە ناوەین رزگاربۊیل لە پێکهاتە جیاجیاگان کە تاوانەیل "داعش" گردیەیانە ئامانج.
بارزانی، دووپاتکردنی نووەو کرد کە هەرێم کوردستان هەر وە پاڵپشتیگ ئەرا ئێزدییەیل و پارێزەریگ ئەرا مافە رەوایەیل و ناسنامەیان لە کوردستان و عراق و گشت ئەو شوینەیلە کە لەتیان هەن مینێد، وە دەسنشانکردن ئەوە کە تەقەلایل وەردەوام بوون تا وەختیگ تەنیا یەک رفیاگیش بوود، وە ئامانج ئازادکردن رفیاگەیل و گلەوهاوردنیان و ئاشکراکردن چارەنویسیان.
دیاری کرد کە وەدیهاوردن دادپەروەری، و مسۆگەرکردن مافەیل رزگاربۊیل، و ئاشکراکردن چارەنویس بیسەروشوینەیل، و جیوەجیکردن یاسای رزگاربۊە ئێزدییەیل، و دروسکردن رەوشەیل گونجیاگ ئەرا گلەوخواردن ئاوارەیل و دوبارە ئاوەدانکردن شنگال و ناوچە ئێزدییەیل ترەک، دروس کەن لە ئەرکەیلیگ سەرەکی کە تەقەلایەیل وەردەوام بوون ئەرا جیوەجیکردنیان.
دەسنشان ئەرا ئەوە کرد کە لە ماف رزگاربۊیلە بڕەسنە دادپەروەری و ژیانیان وە یەخسیر نەهامەتییەیل جینۆساید نەمینێد، بەڵکم دەرفەت ئەرايان پەیا بکەێد ئەرا بەشداریکردن چالاک لە بیناکردن کۆمەڵگەیان و داڕشتن ئایندەیان، وە دەسنشانکردن ئەوە کە گووشگردن لە دەنگەیلیان و بەشداریکردنیان لەو بڕیارەیلە کە پەیوەندی وە مافەیل و ژیانیانەو دیرن لە بەشیگ بنەڕەتی لە دادپەروەری و رێزگردن لە کەرامەت مرۆڤایەتی.
نێچیرڤان بارزانی لە قسەیلی وتیش کە سەرکەفتن توڕەگە لە سەرکەفتنیگ تیەێدە دی ئەرا ئەو تەقەلایەلە کە ئامانج لەلیان وەدیهاوردن دادپەروەری و خاسەوبۊن و وەهیزکردن ئاشتی و وەیەکەوژیانە، وە پیرۆزباییکردن لە رزگاربۊیل لەی دەسپێشخەرییە، و دەسخوەشی لە ئازایەتی و وەرگەگردن و رکدارییان لەبان وەرەونواچگن.