شەفەق نیوز - هەولێر

نێچیرڤان بارزانی، سەرۆک هەرێم کوردستان، ئمڕوو جمعە، داوای پارێزگاری لە سیستەم فیدراڵی لە عراق، و قەوارەی دەستووری ئەرا هەرێم کوردستان کرد لەڕی قایمکردن یەکڕزی کوردستانییەو.

یەیش لە بەیاننامەیگ هات کە دەریکرد وە بونەی ساڵیاد 65 ئەرا دەسوەپیکردن شۆڕش ئەیلول، وە یادهاوردن سەرکردەگەی و سەرکردەی بزووتنەوەی رزگاریخوازی ئەرا گەل کوردستان سەرکردەی رەحمەتی مەلا مستەفا بارزانی، و گشت تێکۆشەرەیل و هیزەیل پێشمەرگە "کە باڵ و بنەڕەت سەرەکی ئەرا ئی شۆڕشە بوین".

 سەرۆک نێچیرڤان بارزانی لە بەیاننامەگەی وت "شۆڕش مەزن ئەیلول - کە داڵگ شۆڕشەیلە لە کوردستان - لە قۆناغیگ سەخت دەس وەپی کرد کە لەناوی بویین گەل کوردستان و مافەیلی رەت کریاد، و ئەو مەشخەڵەس کە هوشیاری رووشنەو کرد و ناسنامەی نەتەوەیی و نیشتمانی چەسپان، و گشت چینەیل و توێژەیل و پێکهاتەیل ئایینی و نەتەوەیی لە کوردستان لە ژیر یەک چەتر گردەو کرد"، و دیاری کرد کە شۆڕشەگە ئاڵشت بۊ ئەرا ئیرادەیگ قایم کە دەنگ ئازادی رەوای گەل کوردستان رەسانە جەهان، و یەکەمین خشت نریا ئەرا دانپیادان فەرمی و دەسکەفتە دەستوورییەیل کە وەدۊای هاتن.

 سەرۆک هەرێم کوردستان وە ئی بونە دووپاتکردن خوەی لەبان بەها بەرزەیل شۆڕشەگە نووەو کرد کە خوەی دۊنێد لە یەکڕزی، و یەکگردن، و وەیەکەوژیان و قەبووڵکردن وەرانوەر، و تەقەلا ئەرا بڵاوکردن ئاشتی، و چۊنکە وەرگەگردن شۆڕش ئەیلول و سەرکەفتنی بەرهەم یەکڕزی و یەکگردن بۊ، ئەوە تەنیا ریە ئمڕوو ئەرا پارێزگاری لە فیدراڵی، و قەوارەی هەرێم کوردستان، و مافە دەستوورییەیل، و رەدکردن گشت ئاڵەنگارییەیل، لە کار هاوپشتی و چەسپانن گیان یەکگردن و هاوکاری لەناوەین گشت هیزەیل و لایەنە سیاسییەیل مەنیەسەو، تا بانیایگ ئارامتر و گەشەدارتر ئەرا نەوەیل ئایەندەمان مسۆگەر بکەیمن".

 شۆڕش ئەیلول لە 11ی ئەیلوول/ سێپتەمبەر ساڵ 1961 وە سەرکردایەتی سەرکردەی کورد رەحمەتی مەلا مستەفا بارزانی دژ وە رژێم عراقی ئەو وەختە دەس وەپی کرد، تا بوودە یەکیگ لە دیارترین وێستگەیل خەبات نەتەوەیی کورد لە سەدەی بیسەم.

 شۆڕشەگە وەسف کریا وە گشتگیریی ئەرا ناوچە جیاجیایەیل کوردستان عراق، و سەرکەفت لە چەسپانن ناسنامەی نیشتمانی کوردی و رەسانن دەنگ گەل کورد ئەرا ناوەندەیل هەرێمی و ناودەوڵەتی.

 بارزانی هێمایگ بۊ ئەرا ئی شۆڕشە و سەرکردە ئیلهامبەخشی، کە بزووتنەوەی رزگاریخوازی کوردی وە قایمی و رکداری سەرکردایەتی کرد، و شۆڕش ئەیلول کردە مەکتەویگ ئەرا خەبات سیاسی و سەربازی، ئەوەیش هیشت تا ئمڕوویش وە ناو "شۆڕش نەمر" لە هۊرمان کوردی بناسیەێد.