شەفەق نیوز/ سەرۆک هەرێم کوردستان، نێچیرڤان بارزانی، سەرەتای ئەوە وە لاپەڕەیگ گرنگ و قۆناغیگ نوو لە چوارچێوەی پتەوکردن پەیوەندییەیل ناوەین ئیران و هەرێم باسی کرد، دووپاتیش کرد کە ریکارەیل ئەمنی و کۆنتڕۆڵکردن سنوورەیل گرێدەو ئەرا ریگریکردن لە هەر جویلەیگ کە هاتێ کاریگەری لەبان ئارامی هەردوگلا بوود.
بارزانی لە چەوپیکەفتنیگ وەرد ئاژانس ئیسنای ئیرانی، دوو سەردانەگەی ئەرا تەهران و پیشوازیکردنی لە سەرۆک کۆمار ئیران لە هەرێم کوردستان وە وازکردن لاپەڕەیگ گرنگ لە پتەوکردن پەیوەندییە دووانیەیل وەسفکرد.
هەمیش دەسنشان ئەوە کرد کە ئی سەردانەیلە بەشدار بوین لە درویژەداین وە گفتوگۆی وەردەوامە ناوەین عراق و ئیران ئەرا دەسەوەرکردنی ئاسایش و ئارامی لەبان سنوورەیل، ببجگە لە فراوانکردن هاوکاری ئابووری و پەرەپیدان ئاڵشتکردن کولتووری و زانستی.
بارزانی دووپاتیش کرد کە لایەنە پەیوەندیدارەیل لە هەردوگ عراق و ئیران وەردەوام چەودیاری و وەدویانەچگن ئەرا چۆنیەتی جیوەجیکردن ئەو ڕێککەفتنەیلە کەن کە لە بوارەیل ئابووری و رووشنهویری و ئاسایش کریانە، ئاشکرایش کرد کە قەوارەی ئاڵوگۆڕی بازرگانی ناوەین هەردوگ وڵات ساڵانە رەسێدە زیاتر لە 10 ملیار دۆلار کە 60%ی لە ری هەرێم کوردستانەو ئەنجام دریەێد.
ئاستەنگەیل
سەرۆک هەرێم کوردستان باس ئەوە کرد کە خواستیک هاوبەش ئەرا قایمکردن پەیوەندییەیل ئابووری هەس، بەڵام له دەروازەیل سنووری ئاڵنگاریی لۆجستی هەس که چارەسەری خوازن، بیجگه لو سزا ئابووریەیلە که لەبان ئیران چەسپیانە، که هاتێ کاریگەری له بان بەشیگ هاوکاری بیاشتوود، دووپاتیش له بان گرنگی پاڵپشتی کەرت تایبەت ئەرا هەردوگلا کرد، هەرلیوا، رێکخستن بڕیگ ریکارەیل گومرگی و دارایی له ناوەین هەولێر و بەغداد ئەرا کارئاسانیکردن چالاکییه بازرگانییەیل.
لەباوەت ڕێککەفتن ئەمنی ئیران و عراق، بارزانی باس ئەوە کرد کە پیشکەفتن وەرچەویگ لەی رویە وەدیهاتگە، وتیش: هەرێم ری وە هویچ هەڕەشەیگ وەبان ئاسایش ئیران یا هەر وڵاتیگ هاوسا نیەێد کە لە خاک کوردستانەو سەرچەوە بگرێد.
هەمیش وت: گام جددی بریاس ئەرا جیگیرکردن سەقامگیری و ئارامی لەبان سنوور و نواگیریکردن لە هەر جموجویلیگ کە هەڕەشە لە ئاسایش کۆمار ئیسلامی ئیران بکەێد.
بارزانی دیاری کرد کە دەزگا و ریخریاگەیل ناو حکومەت هەرێم کوردستان هالە هەماهەنگییگ نزیک وەرد حکومەت فیدراڵی عراق ئەرا جیوەجیکردن مەرجەیل رێککەفتنەگە، لەئەوانەگ گریەدارن وە چووڵکردن ناوچە سنوورییەیل یا ئاڵوگۆڕی زانیاری خوازیاگ، ریکارەیل ئەمنی و کۆنترۆڵکردن سنوورەیل قایمتر کریان تا هویچ جویلەیگ نەوود کە کاریگەری لەبان ئارامی سنوورەیل هەردوگلا بوود.
هەرلیوا، له چوارچیوەی رێککەفتن ناوەین عراق و ئیران کار و تەقەلای وەردەوام ئەرا بەرزکردن هاوکاریی هەمەلایەنە وەرد ئیران ئەرا مسۆگەرکردن مقیەتیکردن ئاسایش ناوچه سنوورییەیل و پتەوکردن پەیوەندییەیل دووانی وەشیوەیگ که خزمەت هەردوگلا بکەێد و رخدارییان لاوەێد، وە لەوەرچەوگردن ئەوە کە ئاسایش و ئارامی سنوورەیل وەرپرسایەتی هاوبەشە.