شەفەق نیوز- هەولێر
نێچیرڤان بارزانی، سەرۆک هەرێم کوردستان، ئمڕوو دووشەممە، شەرمەزار ئەو پەلامارە کرد کە نویسینگەی مەسرور بارزانی سەرۆک حکومەت هەرێم کردە ئامانج، لە وەختیگ نامەیگ وەرەو حکومەت فیدراڵی لە بەغداد کل کرد.
بارزانی، وەپای بەیاننامەیگ کە رەسیە ئاژانس شەفەق نیوز، وە تونترین دەسەواژەیل شەرمەزار ئەو پەلامارەیلە کرد کە شەوەکی ئمڕوو، نویسینگەی مەسرور بارزانی، سەرۆک حکومەت هەرێم کوردستان، و بارەگای نیشتەجیبۊن سەرۆک ئاژانس پاراستن (ئاسایش) کردنە ئامانج، و دووپات کرد کە "ئی پەلامارەیلە وە تەواوی رەتکریایە و وە ئاڵووزییگ رخدار هەژمار کریەێد".
سەرۆک هەرێم کوردستان، داوا لە حکومەت فیدراڵی کرد وە "گردنە مل وەرپرسیاریەتی و پابەندبۊنە دەستوورییەیلی لە مقیەتیکردن ئاسایش وڵاتەگە و ئارامیی، ئەرا زامنکردن دووارەنەۊن ئی جۊرە دەسدریژیەیلە".
دەسنشان ئەرا ئەوە کرد کە "مقیەتیکردن سەروەری عراق و ئاسایش و ئارامیی، لەناویانیش هەرێم کوردستان، وەرپرسیاریەتییگ هاوبەشە، و بایەسە لەبان گشت لایگ کار بکەن ئەرا ئارامەوکردن و کووتاییهاوردن وە ئاڵووزییەیل".
لە لای خوەییشەو بارەگای سەرکردەی کوردی مەسعود بارزانی لە بەیاننامەیگ کە رەسیە ئاژانس شەفەق نیوز وت، "وە تونترین دەسەواژەیل شەرمەزار ئەو پەلامارە وە فرۆکەیل بیفڕۆکەوان (درۆن) کەیمن کە شەوەکی ئمڕوو، لەلایەن ئەودیم سنوورەیل ئیرانییەوە، نویسینگەی سەرۆک وەزیرەیل و بارەگای نیشتەجیبۊن وەڕێوەبەر ئاژانس پاراستن (ئاسایش) لە پیرمام کردە ئامانج".
هەمیش وت، "هەرێم کوردستان لە هیچ مەوقەیگ لە مەوقەیل لایەنیگ نەۊە لەی جەنگ و ئاڵووزییەیل کە لە ناوچەگە هەن، و ئی پەلامارە بیخودە کە هیچ دەسپیچگیگ نەیرن، تەقەلایگە ئەرا شیوانن ئارامی هەرێم کوردستان، و وە دڵنیاییەو، وەکارهاوردن فرۆکەیل بیفڕۆکەوان و مووشەکەیل گرفتەیل چارەسەر نیەکەێد".
لە وەختیگ زۊتر لە ئمڕوو، دەزگای دژەتیرۆر لە هەرێم کوردستان، راگەیان کە نویسینگەی سەرۆک حکومەت مەسرور بارزانی لە شار هەولێر، کەفتە وەر ئامانجکردن وە فرۆکەیگ بیفڕۆکەوان ئیرانی.