شەفەق نیوز - هەولێر

نێچیرڤان بارزانی، سەرۆک هەرێم کوردستان، ئمڕوو شەممە، داوا لە حکومەت فیدراڵی لە بەغداد کرد ئەرا چەسپانن بەش هەرێم وە تەواوی لەناو یاسای بودجەی دارایی گشتی وڵاتەگە ئەرا ساڵ 2027 لەڕی هەماهەنگی و هاوکاری راسەوخۆ وەرد هەولێر، وە ئەوەیش هەژماری کرد کە ئەو گفتوگۆیەیلە کە ئیسە لە ناوەین دەسەیل هونەری وەڕیەو چن "بەس نین".

 سەرۆک نێچیرڤان بارزانی لە قسەیلی ئەرا رووژنامەنویسەیل کە ئاژانس شەفەق نیوز وەدۊای چییە، وت: "گرنگە لەباوەت پرس بودجەگە پرۆژەی یاساگە وە هەماهەنگی و هاوکاری وەرد هەرێم کوردستان ئامادە بکریەێد، و بایەسە بەغدا ئی چشتە بخەێدە وەرچەو و وە جدیبۊنیگ فرەو رەفتار وەردی بکەێد".

 سەرۆک هەرێم کوردستان دیاری کرد کە "دەسەیل هونەری کە دیاری کریانە ئەرا ئامادەکردن رەشنویس یاساگە لە هەردگ لایەو وە راسی دەس وە گفتوگۆیەیل کردنە، وەلی ئی ئاستە بەس نییە"، وە دووپاتکردن لەبان داواکاری هەرێم کوردستان ئەرا "چەسپانن بەشەگەی وە تەواوی لەناو بودجە وە هەماهەنگی لە ناوەین دامەزراوە و فەرمانگە فەرمییە پەیوەندیدارەیل لە کوردستان و حکومەت فیدراڵی چۊ ئامادەکارییگ ئەرا کلکردنی ئەرا ئەنجومەن نۊنەرەیل عراقی".

و لەباوەت دۆسیەی سیاسی ناوخۆیی و رێکارەیل دروسکردن حکومەت، سەرۆک بارزانی وت کە "ئەو تەقەلایەیلە ئامانج لەلیان رەسین لایەنە سیاسییە کوردستانییەیلە ئەرا ئەنجامەیلیگ ئەرێنی"، وە دیاریکردن ئەوەگ کە "پارت دیموکرات کوردستان و یەکێتی نیشتمانی کوردستان وەردەوامن لە بەسیان گردەوبوینەیل، و ئومیدەواریمن ئەو گفتوگۆیەیلە ئەنجامی رەسین وە لەیەکفامستنەیلیگ بوود کە بکەفێدە قازانج کوردستان وە گشت پێکهاتەیلیەو".