شەفەق نیوز - هەولێر

نێچیرڤان بارزانی، سەرۆک هەرێم کوردستان، ئمڕوو دووشەممە، دیاری کرد کە ئەوەگ ناوچەگە لە گرژییەیل ئەمنی و سەربازی وەخوەیەو دیە سەرەتای قۆناغیگ نووە ئەرا خوەرهەڵات ناوڕاس، و لە خود وەخت هوشداری لە دەرئەنجامەیل بەسانن تەنگەی هورمز و وەردەوامی پەکخستن رژیان نەفت عراقی ئەرا بازاڕە جەهانییەیل دا.

یەیش لە مەوقەی بەشداریکردنی هات لە دانیشتنیگ گفتوگۆیی تایبەت لە پەراویز کارەیل رووژ یەکەم دیدار "مێری" کە لە هەولێر بەسیاس.

نێچیرڤان بارزانی وت کە "یە سەرەتای قۆناغیگ نووە لە خوەرهەڵات ناوڕاس، و یە کاریگ گوزەرە و وەختا6 نییە"، و وتیش، کە "بیگومان ئیمە جویر کورد دەرفەتەیلیگ ها لە وەردەممان و شایەت هەڕەشە و گرفتەیلیگ بوود، و ئیمە فرەتر نووڕیمنە دەرفەتەیل ئەرا هەرێم و کورد وە گشتی".

هەڕەشەی ئابووری و بەسانن هورمز

لەباوەت ئەو گرفتەیلە کە رویوەڕوی وڵاتەگە بوونەو، بارزانی رووشنەو کرد کە "گەوراترین هەڕەشە ئەرا رەوشەگە لە عراق شایەت وە فرەیی هەڕەشەیگ ئابووری بوود، لە باوەت ئەوەگ عراق لە روی ئابوورییەو وەرەو کوو چوود؟، و عراق پشت وە نەفت و هەناردەکردنی بەسێد".

وەردەوام بۊ و وت: "لە جەنگ ناوەین ئەمریکا و ئیسرائیل لە لاییگ و ئیران لە لاییگ ترەکەو، عراق فرەتر لە 90 لە سەد لە هەناردەیلی لەدەس دا، و دەروازەیل هەناردەکردن نەفت لە هورمز لە وەردەمی بەسیان، و ئەگەر ئی کێشە چارەسەر نەکریەێد عراق رویوەڕوی کێشەیگ راسگانی بوودەو".

سەروەری و پەیوەندییە هەرێمییەیل

لەباوەت گرفتەیل و هەڕەشەیل، بارزانی پرسیار کرد: "ئەو هەڕەشەیلە کە هەرێم و عراق کەفنە وەریان وەردیان وەرەو کوو چیمن؟ ئایا ئیمە جویر دەوڵەتیگ خاوەن سەروەری رەفتار کەیمن کە پەیوەندییەیل سروشتی و خاسیگ وەرد هاوسایەیلی دیرێد؟".

هەمیش وت کە "هەرێم کوردستان بەشیگە لە عراق، و بایەسە لەبان عراق وە جدی کار بکەێد جویر دەوڵەتیگ خاوەن سەروەری کە خاسترین پەیوەندییەیل وەرد دەوڵەتە هاوسایەیل و دەوڵەتەیل جەهان دیرێد".