شەفەق نیوز- هەولێر

نێچیرڤان بارزانی، سەرۆک هەرێم کوردستان، ئمڕوو جمعە، یاد قوربانیەیل "کوشتارگەی سێمێل" کرد کە ئاشووریەیل لە ساڵ 1933 بۊنە قوربانی، لە وەختیگ دیاری کرد کە کوردستان وە وڵاتیگ هاوبەش ئەرا گشت پێکهاتەیلی مینێد.

 نێچیرڤان بارزانی، لە تویتیگ لەبان پلاتفۆرم "ئێکس" وت: "لە نەوەت و سێیەمین ساڵیاد رووژ شەهیدەیل ئاشووری، سڵاو لە گیان شەهیدەیل و قوربانیەیل بیتاوان کوشتارگەی سێمێل لە ساڵ 1933 کەیمن، وەگەرد دانیشتگەیل فرەتر لە شەس ئاوای لە هەردوگ پارێزگای مووسڵ و دهۆک".

هەمیش وت: "لەی بوونەی پڕ لە ژانە، و لە وەختیگ کە دووپات لەبان مقیەتیکردن و قویلەوکردن کولتوور فرەیی و وەیەکەوژیان و قەبووڵکردن یەکتر کەیمن، ئیمە دڵنیایی وە گشت کۆمەڵگایەیل دەیمن کە کوردستان ئەرا هەمیشە وە وڵاتیگ هاوبەش ئەرا گشتی مینێد".

کوشتارگەی سێمێل رۊداوەیلیگ خۊناویە کە بۊە ئامانج ئاشووریەیل لە باکوور عراق لە ساڵ 1933، و خەسەو بۊ لە شارۆچکەی سێمێل و نزیکەی 63 ئاوای ئاشووری لە ناوچەیلیگ لە لیوای مووسڵ لەو وەختە، لەناو هەردوگ پارێزگای نەینەوا و دهۆک ئیسە.

 تونی رۊداوەیل لەماوەی ناوەین 8 و 11 ئاب / ئۆگۆستس 1933 بەرزەو بۊ، لە سای گرژییگ سیاسی و ئەمنی ناوەین حکومەت عراقی و ئاشووریەیل، و وە کوشیان شمارەیگ لە قوربانیەیل و ئاوارەبۊن شمارەیگ لە دانیشتگەیل ئاشووری لە ناوچەیلیان کووتایی هات.

 سەرچەوەیل دیاری کەن ئەرا کوشیان نزیکەی 600 کەس لەماوەی رۊداوەیل، لە وەختیگ مەزەنەی میژوویەیل لەباوەت شمارەی قوربانیەیل و قەوارەی ئەو ئۆپراسیۆنە کە ناوچەگە وەخوەیەو دیە جیاوازی دیرن، و دیاری ئەرا ئی رۊداوەیلە لە ئەدەبیات میژوویی ئاشووری وەناو "کوشتارگەی سێمێل" کریەێد.