شەفەق نیوز - هەولێر

توڕ هاوپەیمانی زیندانییەیل و کۆمەڵەی مافەیل مرۆڤ لە هەرێم کوردستان، ئمڕوو شەممە، وە هاوکاری وەرد دەزگا حکومییەیل لە هەرێم کوردستان، کۆنگرەیگ تایبەت ساز دان ئەرا باسکردن لە دۆسیەی هەڵوەشانن سزای سێدارە و وسانن جیوەجیکردنی.

دادوەر خانەنشین و پارێزەر، رزگار محەمەد ئەمین، یەکیگ لە بەشداربۊەیل لە کۆنگرەگە، لە قسەیلی ئەرا ئاژانس شەفەق نیوز وت، کە "باوەت هەڵوەشانن سزای سێدارە پەیمانبەسییگ یاساییە کە فرەیگ لە وڵاتەیل پیشکەفتگ جەهان جیوەجیی کەن، وەلی بڕیگ لە وڵاتەیل عەرەبی و ئاسیایی هێمان پشت وەپی بەسن وە مدوو قورسی و گەورەیی ئەو تاوانەیلە کە کریەێد".

وتیش کە "هەرێم کوردستان، وەرد ئەوەگ بەشیگە لە دەوڵەت عراق، بڕیار لەبان سێدارەدان دەێد وەلی جیوەجی نیەکەێد و سزادریایل هیلێد، کە یەیش بۊەسە مدوو شڵەژان لەناو بەندیخانەیل وە مدوو دەرچگن بڕیارەیل بی جیوەجیکردنیان"، و هەرێم لە فرەیگ وەختەیل کەفێدە ژیر بڕگەیل یاسای جیوەجیکردن عراقی، هاوشان وەرد کەفتنە ژیر چەودیاری وەردەوام لەلایەن رێکخراوەیل ناودەوڵەتی و مافەیل مرۆڤ.

لەلای خوەیەو، وەڕێوەبەر گشتی چاکسازییەیل هەرێم، ئیحسان عەبدولڕەحمان، ئەرا ئاژانس شەفەق نیوز ئاشکرا کرد لە بۊین 6 بنکەی چاکسازی لە هەرێم کوردستان کە سەرجەم 6400 بەندکریای لەخوەی گرێد.

عەبدولڕەحمان دیاری کرد کە "لە ناو ئی بەندکریایەیلە، 2000 کەس دەسوەسەرکریاگ و سزادریاگ هەس وە تومەت پەیوەندیدار وە وەکارهاوردن و بازرگانیکردن وە ماددە هوشبەرەیل، ئەو چشتە کە نزیکەی سێیەکی گشت زیندانییەیل هەرێمە"، وتیش کە ئی شمارە هوشیاری دەزگا ئەمنی و ناوخۆییەیل نیشان دەێد لە وەشوینکەفتن تۊشبۊەیل وەرد ئی دۆسیەیلە.

وتیش: "6 ناوەند ئەرا ئامادەکردن دەسوەسەرکریاگەیل و دۆسیەیل ماددەی هوشبەر واز کریاگە، و تا ئیسە 1135 کەس وەرگردگە، وەلی هێمان هەوەجە وە ناوەند فرەتر دیریمن تا وەکارهاوەرەیل لە سزایەیل یاسایی دویر بخەیمن و سەرلەنوو تیکەڵیان بکەیمنەوە وە کۆمەڵگا".

لەباوەت دۆسیەی سێدارەدان، عەبدولڕەحمان دووپات کرد لە بۊین "544 بەندکریای کە بڕیار لەبان سێدارەدانیان دەرچگە لە بەندیخانەیل هەرێم، وەلی سزاگە وسیاگە و جیوەجی نیەکریەێد".

وەڕێوەبەر چاکسازییەیل پەردە لەبان کۊنەترین رەوش لە سێدارەدان وسیاگ لە هەرێم لادا و وت، کە "گلەو خوەێد ئەرا ژنیگ کە لە ساڵ 1992ـەو فەرمان سێدارە لەبانی دریاس وە مدوو کوشتن شمارەیگ لە ئەندامەیل خیزانەگەی، و هێمان بەندکریاس لە چاکسازی ژنەیل لە هەولێر لە ماوەی 34 ساڵەو بی ئەوەگ سزاگە لەبانی جیوەجی بکرێد".