شەفەق نیوز/ ژەنیڕاڵیگ ئەمریکی، لە دیدار نئچیروان بارزانی سەرۆک هەرێم کوردستان، ئمڕوو سێشەممە، دووپات لە پابەندی واشنتۆن کرد پە هاوکاری و هەماهەنگی ئەرا مسۆگەرکردن لەناوبردن یەکجاری وە ریخریاگ داعش.
ئەوەیش لە پێشوازیکردن بارزانی لە ژەنیڕاڵ کیس فلبس وەرپرس سەربازی پایەبەرز وەرپرس نۊیسنگەی هەماهەنگی ئەمنی ئەمریکی لە عراق و شاندیگ دیبلۆماسی وە یاوەریی هات.
سەرۆکایەتی هەرێم لە بەیاننامەیگ رەسیە ئاژانس شەفەق نیوز وت: کۆبونەوەگە باس لە دۊیاترین نووەوبۊیەیل ئەمنی و سەربازی لە عراق کرد، وەگەرد نواگردن تیرۆر و جۊلە و پەلامارەیل داعش لە عراق و سوریا، نو رەوشەیل هاماری نەینەوا و شەنگال، و چاکسازی لە وەزارەت باوەتەیل پێشمەرگە و هاوکاری و هەماهەنگی لەناوبەین پێشمەرگە و سوپای عراق وهئزەیل هاوپەیمان ناودەوڵەتی و پەلامارەیل لەبان هێزەیل هاوپەیمان ناودەڵەتی لە هەولێر کریا.
بارزانی لە دیدارەگە دووپات کرد ک لەناوبردن داعش ئەرا ئاسایش و ئارامی عراق و ناوچەگە گرنگە، و دەسخوەشی لە هاوکاری و پاڵپشتی ئەمریکا و هاوپەیمان ناودەڵەتی ئەرا عراق و هەرێم کوردستان کرد.
سەرۆک هەرێم، جەخت لەبان ڕک و پابەندی وە چاکسازی وەزارەت پێشمەرگە کرد، تا هێزەلی ڕێک بخەێد، و لەبان گرنگی هاوکاریەیل ئەمریکا و دەوڵەتە برادەرەیلە لەی کارە کرد.
لەلای خوەییش، ژەنیڕاڵ فلبیس باس ئاڵشتکردن ئەرکەیل هێزەیل ئەمریکا وەگورەی ئەنجامەیل گفتوگۆ ستڕاتیژی عراق و ئەمریکا کرد، و دووپات لە هاوکاری و هەماهەنگی ئەرا مسۆگەرکردن لەناوبردن یەکجاری وە ریخریاگ داعش کرد.
ژەنیڕاڵە ئەمریکیەگە وتیش؛ خوەیان وە گرنگی نووڕنە چاکسازی لە وەزارەت باوەتەیل پێشمەرگە، و ئەوەسا هاوکاری ئەرای پێشکەش کەن.
هەردوگ لایەنەگە باس گەشەیل ناوچەگە و سەختیەیل و دەرفەتەیلە و رەوشەیل ئەفغانستان و کاریگەریی کردن.