شەفەق نیوز/ ئەندامیگ لە سەندیکای کراکارەیل میزۆپۆتامیا، شەوەکی ئمڕوو شەممە، لەوەر زەخمەیلی لە پەلاماریگ چەکدار دویەکە لەناوڕاس شار سلێمانی، گیانی لەدەسدا.
سەرچەوەیگ ئەرا ئاژانس شەفەق نیوز وت: دویای پەلامارەگە بریا ئەرا خەسەخانە لە شار سلێمانی، و لە ژیر چەودیاری هویرد بوی وەلایەن پزشکەیل، وەلێ شەوەکی ئمڕوو گیانی لەدەسدا.
حسێن ئەرسان لەداڵگبوی ساڵ ١٩٧٨ لە ویلایەت میردین لە تورکیا، لە ئەنجام کارەیل سیاسی هاتیەسە هەرێم کوردستان، و لە شار سلێمانی نیشتەجی بویە.
دویەکە جمعە، کوردیگ خاوەن رەگەزنامەی تورکی وە پەلاماریگ چەکدار وەلایەن کەسەیلیگ نەناسیاگ لە شار سلێمانی زەخمدار بوی.
میدیایل راگەیانن نزیک لە پەکەکە وتن: ئەندام سەندیکای کراکارەیل میزۆپۆتامیا لە شار سلێمانی لە وەردەم بنکەی سەندیکاگە کەفتە وەر پەلاماریگ چەکدار و زەخمدار بوی، ک ئەرا خەسەخانەی شۆڕش لە سلێمانی بریا.
وەگورەی زانیاریەیل، ئەو کەسە ک پەلاماري دريا، پەیوەندی وەگەرد پەکەکە دیرێد.