شەفەق نیوز/ وەزارەت تەندروسی لە حکومەت هەرێم کوردستان، ئمروو شەممە، راگەیان توومارکردن ٤ مردن و ٣٠٦ تۊشهاتن نوو وە ڤایرۆس کۆڕۆنا لە ماوەی ٢٤ سەعات گوزەشتە. 

وەزارەتەگە لە بەیاننامەیگ رەسیە ئاژانس شەفەق نیوز وت: تاقیگەیلی وە ماوەی ٢٤ سەعات گوزەشتە، ٤٠٦٨ وەشکین ئەنجام دانە، لەناویان تۊشهاتن ٣٠٦ کەس وە ڤایرۆس کۆرۆنا ئاشکرا بۊە.

بەیاننامەگە وتیش: ٤٩٥ بیمار لە پەتاگە خاسەو بۊن، و هەمیش ٤ مردن لە گشت ناوچەیل هەرێم کوردستان توومار کریا.   

بەیاننامەگە دیاری کرد ک گشت شمارەی ئەو کەسەیلە ک لە هەرێم کوردستان کەرەنتین کریانە رەسیە ٢١٨٧١ کەس، و تاقیگەیل وەزارەتەگە لەماوەیل گوزەشتە ٢٩٨٧٣٩١ وەشکین ئەنجام دانە، لەناویان تۊشهاتن ٤٣٠٨٧٩ کەس وە ڤایرۆسەگە ئاشکرا بۊە، ٤١٣٦٤٩ لەلیان خاسەو بۊنە، و ٧٣٦٦ مردنە.