شەفەق نیوز/ دکتۆر کەماڵ مزهر ئەحمەد زانیار و رووژنامەنووس کورد، دویای ململانەی دریژیگ وەگەرد بیماری، ئمڕوو سێشەممە، کۆچ دویایی کرد.
دکتۆر عسام فەیلی ماموستای زانستە سیاسییەکان لە زانکۆی موستەنسریە لە عراق، ک نزیکە لە بنەماڵەی دکتۆر کەماڵ، ئەرا ئاژانس شەفەق نیوز وت: مزهر لە خاک بیگانەیی کۆچ دویایی کرد.
وتیش؛ عراق یەک پایەیگ زانستی و مرۆیی لەدەسی چگ، هاوکار بوی لە دەوڵەمەنکردن جوولەی زانستی وە نەختەیل جیوازیگ لە عراق و جهان عەرەوی.
دکتۆر کەماڵ مزهر ئەحمەد حاج رەسوڵ مێژوونووس و هویرکەروەی کوردی لە ئاوای ئەخجلەر لە ناحیەیگ سەروە لیوای کەرکوک لە ساڵ ١٩٣٦ لەداڵگ بوی، و خوەنەواری ناوەندیی لە ساڵ ١٩٥٥ تەواوکرد، و چگە کولێژ پەروەردە لە بەغداد، و لە ساڵ ١٩٥٩ لەلی دەرچگ، و بەکالۆریۆس مێژوو وە پلەی شەرەف لە ساڵ ١٩٥٩ وەرگرد.
و ئەرا تەواوکردن خوەنستن باڵا، روی کردە یەکێتی سۆڤیەت و لە ساڵ ١٩٦٣ دکتۆرا لە پەیمانگەی ئیستشراق سەروە ئەکادیمیای زانستەیل سوڤێتی وەرگرد، و هەر لەیە نەوسیا، بەڵکم وەردەوام بوی تا دکتۆرای نائوم لە خود پەیمانگاگە لە ساڵ ١٩٦٩ وەرگرد، ک خوەی باڵاترین بڕاوانەمەی ئەو وەختە لە یەکێتی سۆڤیەت بوی.
ئەرا عراق گلەو خوارد، و بویە ماموستای بەش مێژوو لە کولێژ ئاداب، و ئەرا پلەی ماموستایی بەرزەو کریا.
خزمەتەکانی دریا کۆمەڵگەی زانستی کوردی، و پۆست ئەمیندار گشتی و یاوەر سەرۆک کۆمەڵگەی زانستی لەناونی ساڵەیل ١٩٧١ و ١٩٧٥ وەرگرد.
برادەرمان ماموستا حەمید مەتبەعی لە هەڵبژاردەی ناودیارەیل عراق لە سەدەی بیس (بەش یەکەم، بەغداد، ١٩٩٥) لەبانی نووسان.
سەرپەرشتیاری لەبان ژمارەیگ لە پەیام و تۆێژینەوەکان لە چەن زانکۆیگ کرد، و فرەی ئەو پەیام و تۆێژینەوەیلە دەربارەی باوەتەیل ئیرانی و باوەتەیل مێژوو عراق هاوسەردەمی و سیاسەت تورکی و باوەتەیل هویرکردن و خوەرهەڵاتی و ئەو کەسایەتیەیلە بوینە خاوەن دەور گرنگیگ لەدروسکردن عراق نوو و هاوسەردەم داشتنە بوین.