شەفەق نیوز/ بەشار فائق ئەو گەنجە لە خەڵک هەرێم کوردستان، دویای ئەوە ک لە ئەحواز ئیران وەچەقوو زەخمدار کریا، گیانی لەدەسدا.

فائق ٢١ ساڵان خەڵک ناوچەی بەردەڕەش لە پارێزگای دهۆکە، وەرجە چەن رووژیگ لەو شارە ک پایتەخت پارێزگای خوزستانە، کەفتە وەر چەقوو.

فائق یە نزیکەی دوو ساڵە لە کۆلێژ پزشکی لە یەکیگ لە زانکۆەیل شار خوزستان خوەنێد.

ئەو گەنج خوەنەوارە لە سێیەی تەشرین دویەم کەفتە وەر پەلاماریگ وە چەقوو لە پارکیگ نزیک زانکۆەگەی، و دویای زەخمداری سەختی، مۆبایلەگەی بریا.

وەگورەی قسەی کەسوکارەیل فائق، پەلامارەگە پەیوەندی وە رەوش سیاسی ئیسە لە ئیران نەیرێد.