حکومەت هەرێم کوردستان لە بەیاننامەیگ رەسیە ئاژانس شەفەق نیوز وت: سەرۆک حکومەت هەرێم کوردستان، ئمڕوو چوارشەممە، پیشوازی لە باربارا لیف خانمە یاوەر وەزیر دەرەوەی ئەمریکا ئەرا کاروبار خوەرهەڵات ناوڕاس و شاند یاوەری کرد.
وتیش: لە دیدارەگە باس نووەوبویەیل لەناو عراق، و شیوەیل قایمکردن بنەمایل برادەری ناوبەین ئەمریکا و هەرێم کوردستان کریا.
لە دیدارەگە رووشنایی خریا بان گرنگی چارەکردن باوەتەیل ناکۆکی ناوبەین هەرێم کوردستان و حکومەت فیدڕاڵی ک پەیوەندی وە نەفت دیرن وە نزیکترین وەخت، ئەوەیش ئەرا وەپشتسەرنان ئەو زەردە ک رەسێدە هاووڵاتیەیل هەرێم کوردستان و عراق وەگشتی.
لە باوەت رەوش هەرێم کوردستان، سەرۆک حکومەت هەرێم کوردستان دووبارە دووپات لە گرنگی جیوەجیکردن هەڵوژاردن لە مەوقەی دیاریکریاگ خوەی لەماوەی ئی ساڵە کرد، و لە خود وەختەگە دووپات کرد ک حکومەت هەرێم کوردستان ئامادەس ئەرا پیشکەشکردن گشت ئاسانکارییگ ئەرا ئی باوەتە.
لە یەشیگتر لە دیدارەگە، هەردوگ لایەنەگە باس چاکسازی لە وەزرات پیشمەرگە وەگەرد گرنگی جیوەجیکردن رێککەفتن شنگال و گونجانن رەوشەیل لەو ناوچە کریا، وەو شیوەیگ مسۆگەر دەرکردن میلیشیایل و گرووپەیل چەکدار نایاسایی لەناوی، و گلەوداین ئاوارەیل ئەرا میلکان خوەیان.