شەفەق نیوز/ جەژن سەر ساڵ ئێزدی (چارشەمبا سۆر) یەکێگە لە جەژنەیل دیار ئێزدی و گشت ساڵێک لە مانگ نیسان کریەێد و وەو بوونە ئمڕوو چوارشەممە  لە سەرجەم دامودەزگایل حکوومەت ھەرێم کوردستان پشوو فەرمیە. 

لە باوەڕ ئێزدی، وەپەی ساڵنامەی خوەرهەڵاتی لەدویای 13ی مانگ نیسان یەکەم چوارشەممە جەژن سەر ساڵە، ئەراوە ئمساڵ رووژ 20 نیسان بوودە یەکەم چوارشەممەی دویای 13ی مانگ و جەژن سەر ساڵ ئێزدی. 

جەژن سەر ساڵ ئێزدی (چارشەمبا سۆر) لە ماڵەیل و وەتایبەت لە پەرستگەی لالش وە چەن ڕێوڕەسمیگ وەڕیەو چوود و ئێزدیەیل لە سەرانسەر جەهان روی لە لالش کەن و دویای نیمەڕو رووژ جەژن گەنجەیل ئێزدی روی وەرەو کویەیل دەورگرد پەرستگەی لالش کەن و گوڵ هەمەڕەنگ وەرز وەهار لە سروشت گردەو کەن و دانەنەی دەرە بویچکەیل پەرستگەی لالش. 

لەی رووژە 365 خزمەتکار پەرستگەی لالش لە ساعەت پەنج ئێوارەی ''چارشەمبا سۆر'' دەسکەنە  ھەڵکردن 365 چرا جویر نشانەیگ ئەرا رووژەیل ساڵ لەناو پەرستگەی لالش و کنار کویەیل دەورگردی. 

"ئاو زمزم" یەکیگ لەو کانیەیل ئاوە لە پەرستگای لالش ک کەفێدە ناو ئەشکەفتیگ و لە پەنج چەو ئاوە، ژن و پیاوەیل ئێزدی هەرکامیان وە جیا و گرووپ گرووپ  دەس لە کانیەیلە شوورن و سەر و دەموچەویان وە ئاوەگە تەڕ کەن. 

لەی جەژنە هەر ماڵیگ ئێزدی 50 تا 200 خا کوڵنێد و ئیجا وە ڕەنگەیل  جیاواز ڕەنگی کەن جویر نشانەیگ ئەرا سەرەتای دروسبوین زەوی وە گشت رەنگەیلی، و دویای جەژنەگە بەشیگ لە خیزانەیل ئی خایلە خەێدە لای قەور مردگەیلی، و بەشیگیش خاگان دەێدە کەسەیلیگ تا بخوەنەی.