بڕیگ لە بفرووشەیل پەس ئوشن لەدویای سێ رووژ لە دەرچگن بڕیارەگە نەچیەسە جیوەجیکردن "نرخەیلە بەرزن"  باوجی مەزەنەکەن بڕیارەگە لە دویای زیاتر لە 10 رووژ کاریگەر بوود.

بفرووشیگ وە ئاژانس شەفەق نیوز وت "بازاڕیان وە رێژەی  90% وسیایە کەس ئاژەل نیەسینێد لەوەر بەرزی فرەیگ نرەگەی، بڕیارەیل حکومەت هویچ کاریگەریگ نەداشتیە".

ئاسۆ عومەر قسەکەر فەرمەر بازاڕ بزگیرەیل لە سلێمانی وە ئاژانس شەفەق نیوز وت، "نرخەگە تا ئیسە بەرزە نر یەک کیلو گوشت کاوڕ هاناوەین(23 إلى 24) هەزار دینار، دیاریکرد "جموجویل بازاڕ وسیاگە، و لە دویای بەشەوکردن مووچە جویلێد". 

دیاریکرد "فرەیگ لە بازرگانەیل کەوپەیلیگ دیرنێ بەش دە رووژ کەێد وەلای کەمەو، یەیش وە ئەو مانا بازرگانەگە وە نر کوەێنە سەندیەسێ  نیەتوەنن کەمتر لەوە بفروشنێ".

وتیش، "هەر بڕیاریگ دریەێد وەلای کەمەو هەوەجە وە دە رووژ کەێد ئەرا دروسکردن کاریگەری وەبان بازاڕ"دیاریکرد" ئاژەل لەی وەرزە کەمە، یەیشە یەکیگە لە هووکارەیل بەرزەوبوین نرخ گوشت".