١١ ریخریایەگە کە نوێنەرایەتیی زیاتر لە ١٠٠ هەزار کەمئەندام بە گشت ناوچەیل هەرێم کوردستان کەن، یاداشتیگ پیشکەش کردن لەناوی دوو داوا لە حکومەت هەرێم کوردستان کەن.
١١ ریخریایەگە لە کۆنگرەیگ رووژنامەوانی ئازانس شەفەق نیوز ئامادەی بوی داوای توومارکردن مووچەی ئەوانە کردن کە موعامەلیان تەواو بویە و گشت تاقییگ تەواو کردنە و دەرکەفتیە کە کەمئەندامن، و فایلیان پەسەن نەکریاس دویای بڕین مووچەیان.
هەمیش داوای یەکسانیکردن مووچەی کەمئەندامەیل لە هەرێم کوردستان وەرد ئەو پارێزگایل عراق کردن، و دیاری کردن کە مووچەی کەمئەندامەیل لە هەرێم کوردستان ١٠٠ هەزار دینارە، و ١٥٠ هەزار دینار ئەرا ئەوانەگ مووچە نەیرن، و لە پارێزگایل عراق ١٢٥ هەزار دینارە، و ٢٧٥ هەزار دینار ئەرا ئەوانەگ مووچە نەیرن.
حکومەت هەرێم کوردستان ئویشێد؛ دویای ئەو چاکسازییە کە جیوەجیی کرد، زیاتر لە ١٠٠ هەزار کەمئەندام مووچە گرن، و ١٣ هەزار کەمئەندام موعاملە تەواو کردنە و مووچەیان نەوڕیاس.
لە ساڵ ٢٠١٣ەو، لەوەر قەیران دارایی، توومارکردن کەمئەندامەیل وسیا، و لە ساڵ ٢٠٢٠ دەر توومارکردن ئەرا ماوەی چوار مانگ واز کریا، و تەنیا ١١ هەزار و ٨٠٠ کەس توومار کریان.
وەزارەت کار و کاروبار کۆمەڵایەتی لە حکومەت هەرێم کوردستان لە ساڵ ٢٠٢٢ راگەیان کە نزیکەی ١٢ هەزار کەمئەندام لە مووچەی چەودیاریکردن کۆمەڵایەتی توومار کریانە.