شەفەق نیوز/ مەسعود بارزانی سەرۆک پارت دیموکرات کوردستان، ئمڕوو جمعە، وت: زەمینە دی ئامادەکریاس ئەرا ئەنجامدان ئاشتەوایی گشتگیر لە خوەرهەڵات ناوڕاس ئەرا پرس کوردی.

ئەوەیش لە وتاریگ لەناو دیدار (ئاشتی و ئاسایش لە خوەرهەڵات ناوڕاس -

 MEPS 2024) لە زانکۆی ئەمریکی لە دهۆک پیشکەشی کرد.

بارزانی لە وتارەگەی وت: لە هەرێم کوردستان هەڵوژاردان وەڕیەو چگ، لەبان ئەو مەزەنەیلە کە باس ئەگەر جیوەجینەکردنی کردن، ئا گیچەڵیگ وەگەرد جیوەجیکردنی بوود، وەلێ من خوازم سوپاس هاوڵاتیەیل کوردستان بکەم کە هوشیاری خوەیان چەسپانن و وەی دەسکەفتە سەرمان برز کردن.

وتیش: ئومید لە گشتی خوازیمن وەگەرد شەرعیەتەو رەفتار بکەن، و دویای ئاشکراکردن ئەنجامەیل فەرمی وەلایەن کۆمسیۆن باڵای سەروەخوەی هەڵوژاردن ئەوەسا دەسوە دانوسەنین ناوەین گشت لایەنەیل کریەێد ئەرا زویکردن وە دەسوەکاربوین پەرلەمان.

بارزانی وتیش: ئومیدیش لەلیدان خوازیمن پشتگیریمان بکەین تا لە بانان یەک هەرێم بوود، و یەک پەرلەمان و یەک هیز پیشمەرگە و یەک حکومەت کە نوێنەرایەتی گشت پیکاتەیل هەرێم بکەن.

وتیش: وەماوەی کەمتر لە ساڵیگ هەڵوژاردن پەرلەمان عراق وەرەو چوود، و توانای سوودگردن لە ئەزموون هەرێم کوردستان هەس.

بارزانی باس سەرژماری دانیشتگەیل گشتی لە عراق کرد و وت: دڵنیایی کەفتە دەسمان وەنەوین مەبەستەیل سیاسی لەشوین سەرژمارییەگە، و دووپاتکردن لەوە کە هویچ کاریگەریی لەبان ناوچەیل ١٤٠ نەوود.

دووپاتیش کرد کە دانوسەنین گشت گیچەڵەیل چارەسەر کەێد، و ئمڕوو پەیوەندییەیل خاسیگ ناوەین حکومەت هەرێم و حکومەت فیدڕاڵی هەس، و هاوکاری ئەرا چارەکردن گیچەڵەیل گیرهاتگیش هەس.

بارزانی باس رەوشەیل لە ناوچەگە کرد کە وت: قەیرانەیل ناوچەگە و سیمایل جەنگ لە لوبنان و غەززە خەفەتدارە، و ئومید دیریمن ئی جەنگە بووسێدەو و ئی نەهامەتیە تەواو بوود، و دووپات کرد کە لەگشتی گرنگتر ئەوەسە عراق لەی جەنگە دویروەو بخریەێد.

مەسعود بارزانی وتیش: گشتمان چەوەڕی ئەوە کەیمن رەوشەگە دویای هەڵوژاردن سەرۆک نوو لە ئەمریکا ئاڵشت بوود، و گشت مەزەنەیل نشان دەن کە وەڕیەوبردن ترەمپ سەرۆک نوو جیاوازی گەورەیگ لە سیاسەت سەرۆک بایدن دیرێد.