شەفەق نیوز/ مەسعود بارزانی ریبەر کورد، ئمڕوو یەکشەممە، دووپات کرد کە تاوان کیمیاوارنکردن هەڵەبجە، هەر لە ویژدان کوردستانیەیل مینێد، و دووپات لە وەرپرسایەتی دەوڵەت عراق لە جیماگەیل و قەرەبووکردن خاوەن قوربانیەیل کرد.

بارزانی لە پەیامیگ لەبان پلاتفۆرم ئێکس وە بوونەی سی و هەفتەمین ساڵیاد کیمیاوارنەگە وت: زەخم و ژان تاوان کیمیاوارنکردن هەڵەبجە هەر جویر کڕیگ مینێد کە تا هەمیشە لەناو یاد و هویرمان چاڵ کریاس، و قەت لە هویرەو نیەچوود.

وتیش: وەرپرسایەتی ئی تاوان دژوە مرۆییە و دەرئەنجام جیماگەیلی، تەنانەت قەرەبووکردن خاوەن قوربانیەیل کەفێدە مل دەوڵەت عراق.

 بارزانی لە کۆتایی پەیامەگەی سڵاو ئەرا گیان شەهیدەیل هەڵەبجە و بنەماڵە و کەسوکارەیل شەهیدەیل و زەخمدارەیل لە ئەنجام ئی کارەساتە کل کرد.

کوشتار هەڵەبجە لە 16ی ئادار 1988، هەناێ رژیم سەدام حسێن وە چەک کیمیایی پەلامار شارەگە دا، و بویە هوکار کوشیان زیاتر لە پەنج هەزار کەس مەدەنی، فرەیان ژن و مناڵ بوین، و زەخمداری سەخت هەزاران کەس ترەک، کە هیمان بڕیگ لەلییان زیان تەندروسی لەلی دیرن.