شەفەق نیوز/ مەسعود بارزانی سەرکردەی کورد، ئمڕوو جمعە، یاد٣٧ ساڵه‌ی ئه‌نفال بارزانیه‌گان کرد لە هەڵمەتەیل جینۆساید رژیم بەعس دژوە بارزانیەگان.
بارزانی لە بەیاننامەیگ وت: وەگەرد ئی ساڵیادە جەژن قوربانیش هاووەختەو بوود، ولەی رووژ زیاندارە خوەشیەگان جەژن و خەفەت لەدەس چگن ئەزیزەیل تیکڵاو بووین، و پارچە شعریگ ئەرا موتەنەبی ک ئووشێد : ( عيدٌ بأيّةِ حالٍ عدتَ يا عيدُ, بما مضى من أمرٍ أم فيكَ تجديدُ)* فرە گونجیاگە وەگەرد ئی رووژە.
وتیش؛ لە گشت رووژ و ساعەت و جەژنەگان ئەیە خوەی رەوش ژنە بارزانیەگانە، و گشت قەومەیل ئەنفالکریایەگان ک کەفتنە وەر ستەم، تا دەیان ساڵ چەوه‌ڕی دووسەیلیان کردیان، لەبان ئەوەیش وەسەربەرزی مەنن، وە خۆڕاگری لەنوای سەختیەگان، و سەروەری خوەیان داشتن، و وەرخودان خەفەت لەدەسچگن ئەزیزەیلیان کردیان، تا رەسینە لووتگەی لووتگەگان.
وتیش؛ چەن رووژیل کەمیگ هەس لە رووژەیل ساڵەگە، یاد کارەساتیگ یا تاوانیگ یا ستەمیگ لەناوی نەوود ک دژوە گەل کوردستان کریاگە، تاوانەیل گەورا و ناشەریفانە ك لەمێژوو مرۆفایه‌تی لە شیەوەی نەویە، گەل کوردستان توانای توڵەکردن ئەو تاوانەیلە داشت، بەڵکم ئەرا تۆڵە کردن دەس نەورد، و رینمای خوەشبوین پەسەن کرد، و لاپەڕەی نوویگ کردەو، چوونکە کەلتورەگەی جیوازە لە کەلتور خوێڕیەگان وشۆڤینیەگان و داگیرکەرەگان.
وتیش: لەی ساڵیادە هەزاران سڵاو کەیمنە ئەو گیانەیل پاک بارزانیە ئەنفال کریایەگانە و شەهیدان ری ئازادی کورد و کوردستان، ودووپات کەێمن ک وەفاداری ئەرا خوون شەهیدەیل و ئەنفال کریایەیل و قوربانیەیل گەلەگەمان خوەی یەکێتی ریزەیلمانە و براییمان و دووسیمان ئەرا خاکمان.
*واتەی شعرەگەی مەتەنەبی: ئی جەژنەگە وە چ رەوشیگ هاتیدەو؟ ئایا وەگەرد کارەیل گوزیشتە یا کار نوویگ هاوردیدە؟.