شەفەق نيوز/ مەسروور بارزانی سەرۆک حکومەت هەرێم کوردستان، ئمڕوو جمعە، بەیاننامەیگ لە 45مین ساڵیاد جینۆسایدکردن کوردەیل فەیلی دەرکێد، لەناوی دووپات کرد لەبان ئەرک دەستووری و یاسایی حکومەت عراق لە دادپەروەریکردن بنەماڵەیی قوربانیەیل و قەرەبووکردنیان، و گلەوداین گشت ماف و داراییە زەفتکریاییان.

  مەسروور بارزانی لە بەیاننامەگەی وت: ئمڕوو ساڵیاد ئەو تاوان نەفرەتیە کەیمن کە رەسیە بەشیگ رەسەن لە مەردم گەل ئیمە، کە هەڵمەتە جینۆساید کوردەیل فەیلیە، کە رژیمەیل لەشوینیەک عراق لە چەن قۆناغیگ جیوەجیی کردن، و لویتکە و وەحشیانەی لە ساڵ 1980 بوی، کە وەبی هویچ گوناهیگ تەنیا بنچینەیان، رژیم وەرین عراق دەسکردە بارکردن و ئاوارەکردن سەدان ھەزار لە کوردەیل فەیلی لە عراق وە زوورەملی، و سەرنقومکردن بڕیگ ترەکیان، و لەبان ئەوە نەوسیا، کە پویل و دارایییان زەفت کرد، و رەگەزنامەیان سڕیەو.

 وتیش، ئمڕوو؛ کە چل و پەنجەمین ساڵیاد ئی نەهامەتیە کەیمن، دووارە دووپات لە گرنگی ئەوە کەیمن کە حکومەت عراق ئەرک و وەرپرسایەتیەیل یاسایی و دەستووری وە تەواوی جیوەجی بکەێد، لە نوایان قەرەبووکردن بنەماڵە و کەسوکارەیل قوربانیەیل ئی جینۆسایدە و گشت تاوانەیل جینۆساید، وە قەرەبوویگ دادپەروەری و یەکسانی، و گلەوداین ئەو ماف و داراییەیلە کە لەلییان زەفت کریاس.