شەفەق نیوز - هەولێر
مەسرور بارزانی، سەرۆک حکومەت هەرێم کوردستان، ئمڕوو سێشەممە، دووپات کرد کە حکومەتەگەی وەردەوامە لە وەرگریکردن لە مافە دەستوورییەیل هەرێم کوردستان و شایستە داراییەیلی، و لە وەختیگ دووپات کردە بان ئەوە کە کوردستان "بەشبەشەو نیەوود"، و باس بۊین تەقەلایەیل و ریگریکردن کە ئامانجیان شیوانن قەوارەی هەرێم و شکستهاوردن وە پرۆژە خزمەتگوزارییەیل.
یەیش لە وتەیگ لە ناو رێوڕەسم دانان بەرد بنەڕەت پرۆژەی بەنداو "گۆمەسپان" لە پارێزگای هەولێر هات.
مەسرور بارزانی وتیش: "لەباوەت پەیوەندییەیل ناوەین هەولێر و بەغداد، ئیمە وەردەوامیمن لە وەرگریکردن لە مافە دەستوورییەیلمان و شایستە داراییەیل هەرێم کوردستان، و کار کەیمن وە هەماهەنگی وەرد حکومەت فیدراڵی لەبان پەسەنکردن بودجە وە شیوەیگ کە بڕشێدە خزمەت وەرژەوەندی کوردستان و گشت عراق".
دیاری کرد کە "تەقەلایەیلیگ هەس لە دژمان وسن ئەرا ریگریکردن لە دەسخستن هەرێم کوردستان لە مافەیلی، و ئەوانەگ لە دژ حکومەت هەرێم و قەوارەگەی و ئاساییکردن رەوشەیل لە ناوەین هەولێر و بەغداد وسن، هەر خوەیانن ئەوانەگ لە گوزەشتە تەقەلا دانە تا کوردستان خاوەن دەستوور نەوود، و کارانەکردن پەرلەمان کوردستان، و رێزنەگردن لە دەرەنجامەیل هەڵوژاردنەیلی، لە شان بەرزەوکردن داواکارییەیل دادوەری ئەرا هەڵوەشانن پەرلەمان".
بارزانی هەمیش وت: "هەر خوەیان پرسیارەیل خستنە رۊ لەباوەت نیاز لە کاراکردن پەرلەمان کوردستان و ئامانج لەوە، و داوایگ بەرزەو کردن ئەرا وسانن کارەیل پەرلەمان، و یە گشتی نیەکەفێدە خزمەت وەرژەوەندی هەرێم، و خزمەت ئەجێندایەیلیگ کەێد کە قەوارەگەی خەێدە وەر هەڕەشە و رخباری، لە وەختیگ ئیمە گشت تەقەلایگ دەیمن ئەرا پارێزگاری لەی قەوارە"، وە ئاشکراکردن ئەوە کە "دۊای کاراکردن پەرلەمان، شەرعییەت دامەزراوەیل کوردستان پارێزیاگە، و دۊنیمن کە دیموکراسی و ئاشتی خاسترین ریە ئەرا رکابەری، و یا ئەوەسە وەرد ئەوانە چیمن کە خاوەن زۆرینەن، یا دۆڕاگەیلە پەنا بەن ئەرا جیوەجیکردن ئەجێندایەیل گومانلیکریاگ ئەرا وسان لە دژ کاروان وەرەونواچگن هەرێم کوردستان".
سەرۆک حکومەت هەرێم کوردستان دووپات کرد کە "یانە هەر خوەیان لە دژ پرۆژە خزمەتگوزارییەیل وسیان، جۊر پرۆژەی (رووناکی) ئەرا کارەبا، و پرۆژەی (هەژماری من) بانکداری، و پرۆژە خزمەتگوزارییەیل ترەک؛ کە هەمیشە تەقەلایەیل دانە ئەرا شکستهاوردن وەپیان".
بارزانی هوشداری دا کە "رخبارترین لە یە گشتی، تەقەلایەیلیگ هەن ئەرا بەشبەشەوکردن هەرێم کوردستان، و وە گشت لایەگ ئۊشم: کە هەرێم کوردستان بەشبەشەو نیەوود، و دۊنم کە خەڵک سلێمانی هەڵسان ئەرا وسیان لە دژ ئی هەڵمەت ئیسە ئەرا بەشەوکردن هەرێمەگە"، وە دووپاتکردن لەبان ئەوەگ کە "دڵسووز و دووسەیل وەرد یەکتر رۊوەرۊی بونەو ئەرا وەرگریکردن لە یەکگرتگی و قەوارەی کوردستان، و ری وە هیچ ئەجێندایگ نیەیەیمن وە بەشەوکردنی".
سەرۆک حکومەت هەرێم کوردستان لە کۆتایی وت: "زانم کە کێشەیەیلیگ هەس، لە ناویان دۊاخستن خەرجکردن مووچە مانگانەیل، و قەیران دابینکردن نەفت چەرمگ یا بەرزەوبۊن نرخەیلی، و تەقەلایەیلیگ دەریەێد تا ئی دۆسیەیلە وە تەواوەتی بچنە لای حکومەت فیدراڵی و لە دەس حکومەت هەرێم دەرچن، و ئیمە وە تونی لە دژ ئەو تەقەلایەیلە وسیمن".