شەفەق نیوز - ئەڵگەردان تایبەت

مەسرور بارزانی، سەرۆک وەزیرەیل هەرێم کوردستان، دەرچگن سەربازی ئەمریکی لە عراق وە "شەرمەوەر" وەسف کرد کە هاوپەیمانەیل واشنتۆن لە کوردەیل بی پاراستن هیلێدەو، وە هوشدار دا کە سەرۆک وڵاتە یەکگرتگەیل دۆناڵد ترەمپ، دووارەی هەڵەی ئیدارەی سەرۆک باراک ئۆباما کەێد کە لە ساڵ 2011 دەرچگ، وەرجە ئەوەگ ناچار بوود گلەو بخوەێد.

مەسرور بارزانی لە دیداریگ وەرد رووژنامەی "فایننشاڵ تایمز" کە ئاژانس شەفەق نیوز ئەڵگەردانی کرد، هوشداری دا کە دەرچگن ئەمریکی کە مووڵەتەگەی لە 30 ئەیلول/ سێپتەمبەر ئیسە دیاری کریاگە، لە وەختیگ شسویاگ وە شیوەیگ تایبەت لە ناوچەگە رۊ دەێد.

 رووژنامەگە لە زوان بارزانی وت کە "ئیمە لاوازیمن، و پەلامار دریەیمن.. و ئەوەگ ئیسە وە تەنیا بی هیچ سیستەمیگ وەرگری گونجیاگ بمینردەو، با بۊشیمن، ئەوە کاریگ شەرمەوەرە".

 رووژنامەگە لە راپۆرتەگەی دیاری کرد کە وڵاتە یەکگرتگەیل کە بنکە سەربازییە سەرەکییەگەی بەسیایە وە فڕۆکەخانەی هەولێر، نواگیری بڕیگ لە مووشەک و فڕۆکە بیفڕۆکەوانەیل کرد وە وەرگرییە پیشکەفتگەیجەی، وەلی حکومەت هەرێم کوردستان وەرگری ئاسمانی تایبەت وە خوەی نەیرێد.

وەلی سەرۆک حکومەت هەرێم، رووژنامەگە لە زوانی وت کە هەمیش ئویشێد ئەوە نیەتۊنێد ئیجۊر سیستەمەیلیگ وەرگری ئاسمانی بسینێد چۊنکە حکومەت فیدراڵی لە بەغداد خوەی بایەسە بسینێدەیان، و دیاری کرد کە "لەوەختیگ ریگری لەلێمان کریەێد لە سەنین چەک بەشدار خوازیاگ لە وەرانوەر ئی مووشەک و فڕۆکە بیفڕۆکەوان و سیستەمە پیشکەفتگەیلە، ئەوە ئیمە وە سروشت و شیوەیگ ئەنقەس لاوازتر بوویمن".

وەگورەی مەسرور بارزانی، ئەوە شیویانەیل زیاتر وە تایبەت لەژیر سای رەتکردن میلیشیا شیعە هێزدارەیل هاوپەیمان وەرد ئیران ئەرا دانان چەکەیلیان، تۊنێد سیستەم فیدراڵی بڕمنێد و لە ئەنجامی هەڕەشە لە حوکم زاتی ئەرا کوردەیل بکەێد کە وە سەختی وەدەس هاتگە.

 هەمیش وت کە کە هەرێم مەینێدە ژیر هەڕەشە تا ئەو وەختە کە جەنگ ئەمریکی - ئیرانی وەردەوام بوود، و دیاری کرد کە تاران ئویشێد وە مدوو ئەوەگ "دژمنەیلی لەی ناوچەن، ئەوە ناوچەگە بوودە ئامانجیگ رەوا".

 مەسرور بارزانی وتیش "ئیمە هاوپەیمان وڵاتە یەکگرتگەیلیمن، و ئیمە هاوپەیمانەیلیگیمن شانازی وە پی کەیمن".

 راپۆرتەگە دیاری کرد کە واشنتۆن لە ساڵ گوزەشتە کونسوڵخانەیگ وە خەرج 800 مەلیۆن دۆلار لە هەولێر واز کرد، کە گەوراترینە لە جەهان، کە فرەیگ لە کوردەیل ئومید داشتن ئامادەبۊن وەردەوام ئەمریکی لە هەرێم بچەسپنێد، و وتیش کە پەییکەر بینا گەورەگە ماوەی هەفتەیل گوزەشتە وە چووڵ دەرکەفت دۊای ئەوەگ وڵاتە یەکگرتگەیل تاکەیل نابنەڕەتی لە هەرێمەو کیشاوە ماوەی کارە دوژمنکارییەیل وەرد ئیران.

 راپۆرتەگە دیاری کرد کە ئی دیمەنە وە شیوەیگ گەورا جیاواز دەرکەفت وەرد دیمەن کونسوڵخانەی قەرەباڵغ ئیرانی لە نزیکەو، کە نۊنەرایەتی هێماییگ ئەرا نفوز گەورای تاران لە عراق کەێد.

 راپۆرتەگە لە زوان ئەکادیمی لە کۆلێژ لەندەن ئەرا ئابووری تۆبی دۆدج وت کە ئویشێد: کەمەوبوین ئامادەبۊن سەربازی ئەمریکی مەسرور بارزانی لە وەرانوەر وژاردەیگ گەورا نیەیلێدەو بیجگە رەسین وە رێکخستنیگ ئارام ئەرا خوەی وەرد ئیران.

 وەپەی دۆدج ئەوە "ئەو پەیامەسە کە ئاراستەی هاوپەیمانەیل وڵاتە یەکگرتگەیل لەبان مەودای دریژ لە ناوچەگە کریەێد ئاشکراس: رێککەفتن تایبەت خوەد وەرد تاران ئەنجام بیە چۊنکە نیەتۊنرێد پشت وە واشنتۆن بوەسیەێد".

 دۊای ئەوەگ راپۆرتەگە دیاری کرد کە لە شکاتەیل ئیران بۊین سەدان جەنگاوەر کورد ئیرانی ئۆپۆزسیۆن لەناو هەرێم، لە زوان مەسرور بارزانی وت: "هەمیشە گفتوگۆیەیل ئیمە وەرد ئیران فرە ئاشکرا بۊنە، و ئیمە هەڕەشە نیمن ئەرا بان ئەوان، وەلی ئەوان هەمیشە قسە لەبان دوو چشت کەن، کە بۊین هێزەیل هاوپەیمانان لە عراق و بۊین گروپەیل ئۆپۆزسیۆن ئیرانی لە هەرێم".

 لە وەختیگ راپۆرتەگە دیاری کرد کە ئەو ئاڵووزییە کە بەسیایە وە قسەکردن لەبان ئامادەیی جەنگاوەرەیل کورد کە مەشق لە وڵاتە یەکگرتگەیل و ئیسرائیل وەپیان کریاگە ئەرا دزەکردن ئەرا ناو ئیران لەڕی سنوورەیل، لە زوان سەرۆک حکومەت هەرێم وت کە ئی هەڕەشە وە کەم زانستیە و وە "گەوراکریاگ وە راسی" لەقەڵەم دایە، سەرەڕای ئەوەگ راسی میلیشیا کوردە ئیرانییە چەکدارەیل وە ئاشکرا کار لە هەولێر و لە ناوچە ئاوایەیل کەن.

 وەپەی راپۆرتەگە مەسرور بارزانی خوەی ئیسە گیرهاتگ دۊنێد نەک تەنیا لە ناوەین وڵاتە یەکگرتگەیل و ئیران کە هەردگیان جەنگ وەرد یەک کەن، بەڵکم لە رەوشیگ جیگیرنەۊ لە ناوخۆ، وە دیاریکردن ئەوەگ پەیوەندییەیل لە ناوەین هەولێر و بەغداد ماوەی دەیەی گوزەشتە خەراوتر بۊنە، ببجگە داوەزین داهاتەیل نەفت، لە وەختیگ گفتوگۆیەیل ئەرا دروسکردن حکومەت هەرێم هیمان لە وەرانوەر رییگ بەسیاگ مەنیەسەو.

 راپۆرتەگە دیاری کرد کە سەرۆک حکومەت هەرێم کوردستان هوشداری دا لەوەگ وڵاتە یەکگرتگەیل سەرکێشی وە دووارەی ئەو هەڵە کەێد کە سەردەم ئۆباما لە ساڵ 2011 کردیەسەی، لەوەختیگ هێزە جەنگییەیلی لە عراق کیشادەو تا بۆشاییگ ئەمنی بیلێدەو کە بەشداری لە دەرکەفتن داعش کرد، دۊاتر واشنتۆن ناچار بۊ گلەو بخوەێد لە ساڵ 2014 ئەرا سەرکردایەتیکردن هاوپەیمانی دژ وە ریخریایەگە.

 راپۆرتەگە لە زوان سەرۆک وەزیرەیل هەرێم وتیش کە "ئەگەر رەوش ئەمنی گەنترەو بۊد، شایەت کۆمەڵگەی ناودەوڵەتی داوای گلەوخواردن ئەرا ئی ناوچە بکەێد ئەرا دەسمیەتی و وەدەسهاوردن ئارامی لەناوی، وەلی ئەوان تۊنن یە ئیسە جیوەجی بکەن بی چەوەڕیکردن ئەوەگ بەدتر بوون وەرجە ئەوەگ خاسەو بوون".