شەفەق نیوز/ مەسرور بارزانی سەرۆک حکومەت هەرێم کوردستان، ئمڕوو پەنجشەممە، دووپات لە پێویستی هەرێم و عراق وەگشتی کرد ئەرا پشتگیریکردن ئەمریکا و بەریتانیا و کۆمەڵگای ناودەوڵەتی ئەرا نواگردن مەترسیەیل تیرۆر، و هەمیش لە هاوردنەوەی ئاوارەیل ئەرا میلکانیان.
ئەوەیش لە وتاریگ لە مەوقەی بەشداریکردنی لە کۆنگرەیگ لە ری تەکنیک ڤیدۆە کۆنفرانس وە بۆنی ٣٠ مین ساڵیاد دەرچگن بڕیار ژمارەی ٦٨٨ ک تایبەتە وە پەیاکردن پەتای ئارامیگ ئەرا هەرێم کوردستان.
بارزانی باس ناوچەی قەیەغەکردن ناودەوڵەتی لە هەرێم کوردستان کرد ک خاسترین بڕیار بوی لە سەردەم گوزەیشتە لە کۆمەڵگای ناودەوڵەتی دەرچگ.
هەمیش وت: ئیمە وەردەوامی لە پشتگیریکردن ناودەوڵەتی خوازیمن ک وەبی ئەوە توانای بردنەوەی ئاوارەیل ئەرا میلکانیان نەیریمن.
سەرۆک حکومەت هەرێم جەخت کرد ک هیمان تیرۆر مەترسی لەبان هەرێم و گشت عراق دیرێد، و ئیمە پشتگیریکردن ئەمریکا و بەریتانیا ئەرا نواگردنی خوازیمن، وتیش؛ پشتگیریکردن هاوپەیمان ناودەوڵەتی ئەرا هەرێم کوردستان و عراق ئەرا شکستهاوردن تیرۆر فرە گرنگە.
و دووپات لەو دەورە کرد ک هێزەیل پێشمەرگە لە جەنگ دژوە داعش ئەنجامی دا، و وت: پێشمەرگە ئەفسانەی داعش شکان.
دەربارەی رێککەفتن شەنگال لەناوبەین حکومەت هەرێم و حکومەت فیدڕاڵی، بارزاني وت: وەداخەو ک ئی رێککەفتنە جیوەجی نەکریا.