شەفەق نیوز - سلێمانی

سەرچەوەیل ئاگادار، ئمڕوو شەممە، ئاشکر کردن کە لاهور شێخ جەنگی، سەرۆک بەرەی گەل، لە قەڵاجۆڵان سەر وە پارێزگای سلێمانی، ئامادەبویە وەردەم دادگای ئاسایش تا  لەوەردەم دادوەر لێکۆڵینەوە ئیفادە بەێد.

سەرچەوەیگ تایبەت ئەرا ئاژانس شەفەق نیوز وت: شێخ جەنگی کەفتیەسە نوای توومەتەیل پەیوەندیدار وە چەن دۆسیەیگ، لەوانە ماددەی 56 لە یاسای سزادان عراقی، و مادەی 406ی تایبەت وە کوشتن، ئەوەیش دویای کوشیان سمارەیگ کارمەن ئەمنی لە رویوەڕویبوین ئی دویاییە لەناوەین ئەم هێزەیل خوەی و هێزە ئەمنییەیل لە سلێمانی.

سەرچەوەگە وتیش: لێکۆڵینەوەگە بریگ توومەت ترەک لەباوەت تونوتیژییەیل ئی دویاییە او پارێزگاگە هاناویان، دووپاتیش کردن کە دادگا لە چەن رووژ ئایندە وەردەوام بوود لە وەدویاچگن وە دۆسیەگە ئەرا بڕیاردان لەبان ری یاسایی وەرانوەری.

دەرکەفتن جەنگی لەوەردەم دەسەڵات دادوەری لە وەختیگ کە لەی دویاییە گرژییە ئەمنی و سیاسییەیل لە سلێمانی زیاتر پەرە سەنن، وەگەرد بانگەواز بازنەیل جەماوەری و سیاسی ئەرا جیوەجیکردن یاسا و پرسیارکردن لە گشت ئەو کەسەیلە کە پەیوەندییان وەپیەو دیرن، ئەرا مقیەتیکردن ئارامی هەرێم کوردستان.

 شەو پەنجشەممە، شار سلێمانی بڵاوبوین هیزەیل ئەمنی لە ریوبانەیل وەخوەی دی،  وەرجە رویوەڕویبوین ناوەین هێزە ئەمنییەیل و پاسەوانە چەکدارەیل دڵسووز سەرۆک پارت بەرەی گەل لاهور شێخ جەنگی.

میدیایەیل نزیک لە یەکێتی، رووژ جمعە، راگەیانن کە لە ئەنجام ئەو جەنگە کە لە سلێمانی رویدا، وەلای کەمەو سێ کەس کوشیانە و نزیکەی 10 کەس ترەکیش زەخمدار بوین.

هێزە ئەمنییەیل لە سلێمانی، سەرۆک پارت بەرەی گەل، لاهور شێخ جەنگی و برایەیلی، پۆڵاد و ئاسۆ دەسگیرکردن، کە فەرمان دەستگیرکردنیان لە دەرچوێد، ئی دەسگیرکردنە دویای پەلاماردان هۆتێل لالو زار، کە خوەیان و هێزە دڵسووزەیل پەنا وەپی بردوێن.

دادگای لێکۆڵینەوەی ئاسایش سلێمانی بڕیار دەسگیرکردن لاهور شێخ جەنگی دەرکرد وەگورەی ماددەی 56 لە یاسای سزادان عراقی، وە توومەتەیل پەیوەندیدار وە ئەمنی و نەزمی گشتی.

وەگەرد پەرەسەنین ئەو رویوەڕویبوینە، شار سلێمانی دوو پەلامار فڕۆکەی بێفڕۆکەوان و تەقە لە ناوچەی دەباشان وەخوەی دی، کە ماڵ بافڵ تاڵەبانی سەرۆک یەکێتی  ها ئەورا.