شەفەق نیوز/ سهراب کەمەری وەڕیەوبەر گومرگەیل پارێزگای ئیلام فەیلی، راگەیان کە لەی هەشت مانگ گوزەشتە لەی ساڵە، بایی یەک ملیار و52 مليۆن دۆلار لە کاڵا و شمەک لە مەرز مهران سنووری ئەرا عراق و دەوڵەتەیلیگ ترەک هەناردە کریاس.

راپۆرتیگ رووژنامەوانی ئیرانی ئاژانس شەفەق نیوز ئەڵگەردانی کرد لە زوان کەمەری وت: یەک ملیۆن و859 هەزار تۆن لە جویراجویر کاڵا بایی یەک ملیار و52 مليۆن و264 هەزار دۆلار لەی ماوە هەناردە کریاس.

وتیش؛ ریژەی داهاتەیل پارێزگاگە لە پویل گومرگ لەی ماوە رەسیە 341 مليار ريال ئیرانی .

کەمەری وتیش: ریژەی 600 ماشین بارهەڵگر رووژانە لە مەرز ناودەوڵەتی مهران وەبارەو دەرچوود، دویای تەواوکردن ریکارەیل گومرگی.

وتیش: بەشە گەورەکە لەی چشتەیلە کە هەناردە کریەن لە ئامارازەیل وزە و ئاسن و بەرهەم کشتوکاڵی و پترۆکیمیایی و کەرەستەیل بیناسازی و سیرامیک و بەرهەمەیل کانزایی و پلاستیکی.

کەمەری وتیش: لە چوارچیوەی نواگیریکردن قاچاخ، دەسنریا وەبان 63 بار قاچاخی بایی 709 مليار ريال، کە وەڕیژەی 96% لەلای نرخ و29% لەلای شمارە وەرانوەر ساڵ گوزەشتە بەرزەو بویە.