شەفەق نیوز/ فەرزاد شەریفی وەڕیەوبەر میرات کەلتووری و گەشتیاری و دەسڕەنگینی لە پارێزگای ئیلام فەیلی، راگەیان کە بەرهەمەیل چنین لەوان لە شار ئابدانان ئەرا سەڵتەنەتی عومان وەشیوەی فراوانیگ هەناردە کریا.
وەگورەی راپۆرتیگ رووژنامەوانی کە ئاژانس شەفەق نیوز ئەڵگەردانی کرد، فەرزاد شەریفی وت: خانمە هونەرمەن بەهرەدار پەروانە دەرویشی خەڵک ئاوای جابر ئەنسار، توەنست زیاتر لە ٥٠٠ بەرهەم لە لەوان کوالیتی بەرز ئەرا بازاڕ عومان هەناردە بکەێد.
وەگورەی شەریفی، ئی دەسکەفت نرخدارە، وەگەرد پەیاکردن دەرفەت کار ئەرا ژنەیل ئاوایەیل، هەمیش گامیگ گرنگە وەرەو پیشکەشکردن کارەیل دەسڕەنگینیی رەسەن ئەرا جەهان.
هەمیش باس گرنگی کارەیل دەسڕەنگینی کرد ئەرا ئابووری وڵات، کە وت: کارەیل دەسڕەنگینی تەنیا هیمای هەس و هونەر ئیرانیەیل نییە، بەڵکم دەسمیەتی گەورەیگ دەێد لە هاوردن داهات دارایی ئەرا ئیران.
شەریفی وتیش: هەناردەکردن بەرهەمەیل ئابدانان لە لەوان ئەرا سەڵتەنەتی عومان بەڵگەی کوالیتی بەرز بەرهەمەیل ناوخوەییە، و خوازینی لە بازاڕەیل جەهانی.
وتیش: هەناردەکردن بەرهەمەیل لەوان ئەبدانان ئەرا سەڵتەنەتی عومان، وەگەرد لایەن ئابووری و پەیاکردن دەرفەت کار ئەرا ژنەیل ئاوای، هەمیش دەسمیەتی دەێد تا کلکردن کەلتوور دەوڵەمەن و رەسەن ئیران ئەرا ناوچەگە.