شەفەق نيوز – هەڵگەردان تایبەت
فەرزاد شەریفی وەڕیەوبەر گشتی ئاسەواری کەلتووری و گەشتوگوزاری و دەسڕەنگینی لە پارێزگای ئیلام فەیلی، ئمڕوو دووشەممە، ئامادەکردن باوەتیگ ئەرا شەش ئاسەواری میژووی لە کەرت تشوار راگەیان، لەناویان قەورسانەیل و شوینەیل ئاسەواری، و کلکردنیان ئەرا وەزارەت تا لە لیست ئاسەواری نیشتمانی تووماریان بکەن.
ئاژانس "فارس" ئیرانی لە خەوەریگ ئاژانس شەفەق نیوز هەڵگەڕدانی کرد، لە زوان شەریفی وت: باوەت شەش قەورسان و شوین ئاسەواری ئامادە کریاس تا لەناو لیست ئاسەواری نیشتمانی تووماریان بکەن، و ئەرا وەزارەت میرانی کولتووری و گەشتوگوزاری و دەسڕەنگینی کلکریانە.
شەریفی وتیش: ئی کارەیلە "قەورسان ميركان 1"، و"قەورسان و شوین ئاسەواری شيرين ئاو"، و"قەورسان و شوین ئاسەواری سرنەفت"، و"قەورسان باقلعە 2"، و"قەورسان بان كله ئەنارك"، و"قەورسان و شوین ئاسەواری بان گوڵان" گرێدەو، کە گشتیان نرخداری میژووی و کەلتووری و کۆمەڵایەتی گەورەی خوەیان دیرن.
وتیش: بەڵگەکردن هویریدیگ و وەشکین نەخشەیل و وینەگردن و بەرهەمکردن فیلم ئەرا گشت ئی کارەیلە جیوەجی کریا، و ئەو کارەیلە ئەرا ئەنجومەن توومارکردن ئاسەواری کەلتووری لە وڵات پیشکەش کریان.
وەڕیەوبەر گشتی میراتی کەلتووری لە پارێزگای ئیلام فەیلی دووپات لە گرنگی توومار ئی کارەیلە کرد لەناو لیست نیشتمانی، کە وتیش؛ ئی قەورسانەیلە تەنیا شەست وەخاکناین نیین، بەڵکم سومبولەیل کەلتووری و باوەڕی و هونەر و شیوەی ژیان باپیرەیامانە، کە مقیەتیکردنیان ئەرکیگ گرنگە ئەرا رەسانن ئەرزش و زانست میژووی ئەرا نەوەیل هاتگ.
شەریفی لە کۆتایی وتیش؛ توومارکردن ئی کارەیلە زەمینەسازی ئەرا ئەوزەڵکردن گەشتوگوزاری کەلتووری لە ناوچەیل دەورگرد کەێد، وەگەرد زیایبوین گرنگیدان گشتی وە گرنگی مقیەتیکردن میراتی میژووی پارێزگاگە.