شەفەق نیوز/ نێچیروان بارزانی سەرۆک هەرێم کوردستان، ئمڕوو دووشەممە، لە چەوپیکەفتنی وەرد مەحموود مەشهەدانی سەرۆک پەرلەمان عراق، داوای راسەوکردن یاسای بودجە کرد، وەشیوەیگ ماف و شایستەیل هەرێم کوردستان مسۆگەر بکەێد.
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: نێچیروان بارزانی سەرۆک هەرێم کوردستان، لە چوارچیوەی بەرنامەی سەردانی ئەرا بەغداد، شەوەکی ئمڕوو، چەوی کەفتە مەحموود مەشهەدانی سەرۆک پەرلەمان عراق.
هەردوگ لایەن باس پەیوەندییەیل هەرێم کوردستان وەگەرد دەسەڵاتەیل فیدڕاڵی کردن، وەگەرد دووپاتکردن لەبان گرنگی هاوکاری ئەرا چارەکردن گیچەڵەیل گیرهاتگ وەگورەی دەستوور عراق.
هەردوگیان هاوڕا بوین لە گرنگی قایمکردن هاوکاری هاوبەش وەشیوەیگ دەسمیەتی بەێد لە مسۆگەرکردن ئارامی و ئەوزەڵکردن لە وڵات.
سەرۆک بارزانی باس گرنگی رۆڵ ئەنجومەن نوێنەرەیل لە قایمکردن دانوسەنین نیشتمانی و مسۆگەرکردن دادپەروەری و یەکسانی ئەرا گشت پیکاتەیل عراق کرد، و چارەکردن گیچەڵەیل وڵات، وەتایبەت کێشەیل هەولێر - بەغداد.
هەرلیوا، سەرۆک بارزانی زاوا لە سەرۆک ئەنجومەن نوێنەرەیل کرد رۆڵ خوەی لە راسەوکردن یاسای بودجەی فیدڕاڵی ئەرا ساڵ 2025 بڕانێد، وەشیوەیگ دادپەروەری لە مسۆگەرکردن ماف و شایستەیل هەرێم کوردستان وەدەس بارێد، وەتایبەت باوەت دابینکردن مووچەی فەرمانبەرەیل هەرێم کوردستان هەکاتی گشت عراق.
لەلاییگ ترەک لە دیدارەگە، هەردوگ لایەن باس کەسەیل رەوش ناوچەگە و ئەو ئاڵشتبویەیلە لە سوریا، و دووپات لە گرنگی هەماهەنگی ناوەین گشت لایەنەیل کریا ئەرا نواگیریکردن سەختیەیل.