شەفەق نیوز/ وەزارەت تەندروسی لە هەرێم کوردستان، ئمڕوو یەکشەممە، بریار نوویگ دەرکرد لە باوەت مەوقەی راگەیانن هەڵوێست پەتاگە ئەرا بڵاوبوین ڤایڕۆس کۆرۆنا، وئاماژەدا ئەرا زیایبوین وەردەوامیگ لە ژمارەی تووشهاتنەگان.

محمد قادر قسەکەر وەناو تەندروسی کوردستان ئەرا ئاژانس شەفەق نیوز وت: لەئیسە وەرەولا لەوەخت نیمەڕوان هەڵوێست پەتاگان راگەینیمن، لەوەر فرەوەبوین ژمارەی تووشهاتنەگان، وئاماژەدا ک رەوشەگان فرە سەختن و تووشهاتنەگان هانە زیایبوین وەردەوامیگ.

وتیش: وەردەوام دەور ٣٠٠ تووشهاتگ سەخت دیریمن ک ئۆکسجین خوازن، وەگەرد ٥٠ تووشهاتگ سەخت، ولە خود وەختەگە دووپاتکرد ک هیچ چشتیگ کەم نەیریمن لە پێداویستیە پزشکیەگان.

هەمیش وت: ئەگەر رەوشەگە وەیجوورە بچوود و تووشهاتنەگان لەوەردەوامی زیایەوبوون، ئیمە هەڵبەت پێداویستە پزشکیەگان خوازیمن، و هەرچەنی تووشهاتنەگان فرەترەو بوین ، لەوە فرەتر رەوشە تەندروسیەگە خراو بوود.