شەفەق نیوز- ئەڵگەردان تایبەت
شارەزایەیل و ئابووریناسەیل ئیرانی داوای ئاڵشتکارییگ ستراتیژی لە وەڕیەوەبردن پەیوەندییەیل ئابووری و بازرگانی وەگەرد عراق کردن، لەڕی چەسپانن رێڕەویگ ئابووری و شارستانی بڕەر ئەرا سنوورەیل، و گواستنەوەی ئاڵوگۆڕ بازرگانی لە بازنە ناوخۆییە دیاریکریایەگەی وەرەو هاوبەشییگ بازرگانی وەردەوام کە پاڵپشتی لە بەرهەمهاوردن ناوخۆیی کەێد و دەرفەتەیل کار لەبان بنەمای زانست دابین کەێد.
وەپای راپۆرتیگ لە ئاژانس "ئێرنا"ی ئیرانی، کە ئاژانس شەفەق نیوز ئەڵگەڕدانی کردگە، ئی تەمەیلە مەوقەی گردەوبوینیگ ئەرا ئەنجومەن دامەزرانن لە پارێزگای ئیلام فەیلی سنووری لە خوەرئاوای ئیران هاتن.
توێژەر لە کاروبارەیل ئابووری و ئەندام دەسەی مامووستایەیل لە زانکۆی ئیلام، عەزیز مەراسلی، دووپات کرد، کە ئاڵشتکاری وەرەو بازاڕیگ بازرگانی دامەزراوەیی وەگەرد عراق هەوەجە وە دووارە داڕشتنیگ گشتگیر دیرێد کە لە ریباز باو ئاڵوگۆڕ بازرگانی رەد بوود، وەرەو دروسکردن توانایەیل بەرهەمهاوردن کە توانای ململانێ و جیوەجیکردن پەیمانەی کوالیتی ناودەوڵەتی داشتوود.
مەراسلی، رەخنە لە نەوین هەماهەنگی ناونی لایەنە فەرمی و بازرگانییەیل پەیوەندیدار وە دۆسیەی عراقی گرد، لەناویانیش داوەزیان ئابوورییەیل و کونسوڵخانەیل و ژوورەیل بازرگانی و زانکۆیەیل، و دەسنشان ئەرا ئەوە کرد کە فرەیی لایەنەیل بڕیارداین و دووفاقی کارگێڕی سوودوەرگردن تەواو لە دەرفەتە وەردەسەیل پەک خەن.
شارەزا ئابوورییەگە داوای دروسکردن "سەرکردایەتییگ یەکگردگ ئەرا ئابووری دەیشتەکی" کرد کە ئەرک ئاسانکردن ریگریە بازرگانییەیل و دانان نەخشەی رییگ وەختینە دیاریکریاگ سەرچەوە و وەرپرسیاریەتییەیل بگرێدە مل، و دووپات کرد کە وەرەونوابردن بازرگانی وەگەرد عراق هەوەجە وە گواستنەوە لە قۆناغ تەمەیل نووڕین وەرەو جیوەجیکردن بەرنامەیل کردەیی پابەندکەر دیرێد، کە وە نیشاندەرەیل کارای ئاشکرا بپوڕێد.
وراپۆرتەگە ئاشکرای پێشنیاریگ ئەرا دروسکردن "رێڕەویگ ئابووری و شارستانی" کرد کە لەڕی ناوچەیل شیروان و بەدرە و دەرەشار و ئاودانان و دیهلەران لە پارێزگاگە دریژەو بوود، و سوود لە بڕیگ فرە لە سەرچەوەیل ئاوی و زەۊەیل کشتوکاڵی و بنەما گەشتیاری و میژووییەیل وەرگرێد، وەو مەرجە پرۆژەیل ژیرخان و پەمپەیل ئاوی تەواو بکریەن، و گاڵدان بەرهەمکارەیل کەرت تایبەت لە پیشەسازییە ئاڵشتداینەیل و کشتوکاڵی بکریەێد.
هەرلیوا گردەوبویەیل گاڵ دان ئەرا دامەزرانن سەنتەریگ توێژینەوەی تایبەتمەن وە خوەنستنە ئابوورییەیل "ئیرانی – عراقی" لە زانکۆی ئیلام، ئەرا دابینکردن داتا و خوەنستنەیل هۊرد لەباوەت بازاڕەگە کە پاڵپشتی لە بڕیاردەرەیل بکەێد وەرەو بەرهەمکارەیل، لەشان هاندان کەرتە هاوچەرخەیل، جویر ئابووری دیجیتاڵی و زنجیرەیل دابینکردن.
پارێزگای ئیلام فەیلی، لەڕی دەروازەی مهران سنووری، وە یەکیگ لە گرنگترین دەمارە بازرگانییەیل و دەروازە هشکانییەیل ناونی ئیران و عراق هەژمار کریەێد.
لەوەر نزیکبۊن جوگرافی و کولتووری ناوەین ناوچە سنوورییەیل لە هەردوگ وڵاتەگە، کاراکتەرەیل ئابووری دۊنن کە سوودوەرگردن ئیسە هێمان لە خوار ئاست ئومیدە، ئەوەگ هەوەجە وە خستنەناو بەرهەمکارەیل نوو لەناو ژیرخان و کاراکردن دەور کەرت تایبەت ئەرا رەسین وە هاوبەشییگ ئابووری تەواوکار کەێد.