شەفەق نیوز- سلێمانی/ هەڵەبجە
سەرچەوەیگ ناوخۆیی لە سلێمانی، ئمڕوو جمعە، خەوەر دا لە مردن گەنجیگ وە مدوو زەخمەیل سەختیگ کە لە ئەنجام رۊداویگ هاتوچو تویشی هات کە دۊشەو رۊداگە، لە وەختیگ هیزەیل ئەمنی لە هەڵەبجە تەرم پیاویگ بیگانە پەیا کردن کە لە یەکیگ لە بەرزاییەیل کەفتیەسە خوار.
وسەرچەوەگە ئەرا ئاژانس شەفەق نیوز وت کە گەنجەگە "مستەفا قادر"، ماتووڕسکیلیگ رانیاد و تویش زەخمەیل سەختیگ بۊە دۊای دایینی لە ماشینیگ لە جۊر "جێب لاردۆ" شەو دۊکە لە گەڕەک نەورۆز لە شار کفری سەروە ئیدارەی سەروەخوەی گەرمیان لە هەرێم کوردستان.
هەمیش وت کە "زەخمدارەگە لە سەرەتا بریاسە خەسەخانەی شەهید هەژار ئەرا فریاگوزاری لە قەزای کەلار، وەرجە ئەوەگ رخداری رەوش تەندروسییەیلی هەوەجە بکەێد ئەرا یەکیگ لە خەسەخانەیل سلێمانی بوریەێد ئەرا وەرگردن چارەسەری".
سەرچەوەگە دەسنشان ئەرا ئەوە کرد کە "رانندەی ماتووڕسکیلەگە لە سلێمانی گیان لەدەس داگە وە مدوو ئەو زەخمە سەختەیلە کە لە ئەنجام رۊداوەگە تویشی هاتۊد".
لە هەڵەبجە، سەرچەوەیگ ناوخۆیی خەوەر داگەسە ئاژانس شەفەق نیوز کە هیزەیل ئەمنی لە پارێزگاگە وە هەماهەنگی وەگەرد شمارەیگ لە خوەیوەخشەیل، تۊنستنە تەرم پیاویگ هەڵگر رەگەزنامەی بیگانە دەر بارن دۊای وەخوارکەفتنب لە بەرزاییەگ لە پشت ئاوای "بانیشاری کۆن".
دیاری کرد کە وەڕێوەبەرایەتی پۆلیس پارێزگای هەڵەبجە دووپات لەبان پەیاکردن تەرمەگە کردگە دۊای ئەوەگ شیەو بۊە و بوویگ گەن لەلی دەرچگە، ئەوەگ بۊیە مدوو سەختی زانستن ناسنامەی خاوەنی لە وەخت ئیسە، وە مەزەنەکردن ئەوەگ قوربانییەگە هەڵگر رەگەزنامەی ئەفغانیە لەوەر بۊبن خەوەرداینیگ لەباوەت دیارنەمان پیاویگ ئەفغانی لە ناوچەگە.
لە لای خوەییشەو قسەکەر وەناو پولیس هەڵەبجە، ئاکام قوتبەدین ئاغاوەیس، لە بەیاننامەیگ کە رەسیە ئاژانس شەفەق نیوز، وت کە "هیزەیل ئەمنی خەوەریگ وەرگردنە لەباوەت بۊین تەرمیگ لە پشت ئاوای بانی شاری کۆن سەروە قەزای خورماڵ، و دەسوەجێ هازیگ لە بنکەی پولیس خورماڵ و تیمەیل بەش پولیس بەڵگەیل تاوانکاری وەرەو شوینەگە چگن".
ئاغاوەیس هەمیش وت، کە "سەختی ناوچەگە و سروشتە کویستانییەگەی رەسین ئەرا شوینەگە دۊاخست، وەرجە ئەوەگ تیمە تایبەتمەنەیل دۊای چەن سەعاتیگ بتۊنن تەرمەگە پەیا بکەن"، و دیاری کرد کە "کەسەگە پڕتاڵیگ لەوەر کردۊد کە هن وڵاتیگ بیگانەس، و هیچ بەڵگەنامەیگ یا ناسنامەیگ وەپێ پەیا نەۊە کە ناسنامەی بچەسپنێد".
قسەکەرەگە دیاری کرد کە تەرمەگە کل کریەێد ئەرا فەرمانگەی پزیشک دادوەری لە هەڵەبجە ئەرا ئەنجامداین وەشکینە هەوەجەدارەیل، و دەسنشان ئەرا ئەوە کرد کە رەدبۊن وەختیگ دریژ لەبان مردنەگە هیشت زانستن ناسنامەی خاوەنی سەخت بوود، لە وەختیگ پولیس خورماڵ دۆسیەیگ واز کردگە ئەرا لێکۆڵینەوە لە رۊداوەگە و هۊردەکارییەیلی.
سەرچەوەیگ لە قەزای خورماڵ دۊشەو خەوەر دا کە تەرمەگە مەزەنە کریەێد هن کەسیگ لە رەگەزنامەی ئەفغانی بوود، وە مەزەنەکردن ئەوەگ تەقەلا داگە وە شیوەیگ نایاسایی لەڕی ناوچە کویەستانییەیل دەورگرد ئاوای بانی شاری کۊیەن بچوودە ناو هەرێم کوردستان، وەرجە ئەوەگ لە ناوچەیگ بەرزەو بکەفێدە خوار و گیان لەدەس بەێد، لە وەختیگ لایەنە ئەمنییەیل فەرمی تا ئیسە ناسنامەی یا هۊردەکارییەیل مردنی دووپات نەکردنە.