بارزانی لە بەیاننامەیگ رەسیە ئاژانس شەفەق نیوز پەنجا و سێیەمین ساڵیاد رێککەفتن ١١ی ئادار ١٩٧٠ هاوردە یاد، لەناوبەین شۆڕش ئەیلوول وە سەرکردایەتی بارزانی نەمر و حکومەت عراقی، و سڵاو لە گیان گشت شەهیدەیل کوردستان و ئەو قارەمانەیلە کرد ک لە شۆڕش پیرووز ئەیلوول بەشداری کردن.
وتیش: رێککەفتن ١١ی ئادار، سەرکەفتن گەورەیگ بوی لەسای رەوشە سەخت و ئاڵووزەیل هەرێمی و ناودەوڵەتی ک لەو سەردەمە باو بوین، هەمیش گرنگترین بەڵگەنامەی فەرمی مافەیل گەل کوردستان و دادپەروەرانەی باوەتەگەی وە جەهان ناسان.
نێچیروان بارزانی وتیش: ریکەفتنەگە بویە بنەمایگ سەرەکی ئەرا دەسکەفتەیل گەل کوردستان ک دویای ئەوە وەدەس هاتن، هەر لە راپەڕین تا رەسێدە دروسکردن پەرلەمان و حکومەت فیدڕاڵی.
وتیش: رێککەفتن ١٢ی ئادار چارەکردنیگ نموونەیبە توەنست عراق و گشت گەلەگەی وەرەو دویارووژیگ رەنگینتر بوەێد، و بکەێدەی یەکیگ لە دەوڵەتەیل پیشکەفتگ لە ناوچەگە و لە جەهان، وتیش: باوجی پاکیشان دەسەڵات عراق و پەنابردنی وە هاز زوورکاری لەجیای هاز هویر و دانایی، لە جەنگ و نەهامەتی و دویاکەفتن و گوماکردن سامانەیل وڵاتەگە زیاتر هویچیگ ئەرا عراق نەهاورد، و تا ئیسە عراق باج ئەو هەڵە دەێد.
بارزانی داوا لە گشت هیز و لایەنەیل عراقی و کوردستانی کرد لەی میژووە یای بگرن و سوود لە هەڵەیل جاران بگرن، و دەوڵەمەنی و توانای مادی و مرۆیی عراق ئەرا وەدەسهاوردن پیشکەفتن وڵاتەگە و خوەشگوزەرانی هاووڵاتیەیل وەکار بارن.
سەرۆک هەرێم گاڵ گشت هیزەیل دا وەیکەو کار بکەن و مقەیتی ماف گشت پیکاتەیل و سیستەم فیدڕاڵی و ئاسایش و ئارامی وڵاتەگە بکەن، و کار وە وەخشین و وەیەکەوژیان و یەکڕزی و یەکدەسی بکەن ئەرا بیناکردن وڵاتیگ ئاوا و دەوڵەمەن و هازدار و ئەرا بانانیگ خاستر.