شەفەق نیوز/ پۆلیس پارێزگای دهۆک، ئمڕوو دووشەممە، توێنست کابرایگ دەسگیر بکەێد ژن تەڵاقدریای خوەی کوشتگە، دویای کەمتر لە ٢٤ ساعەت لە جیوەجیکردن تاوانەگە.

قسەکەر وەناو پۆلیس دهۆک موقەدەم هێمن سڵێمان ئەرا ئاژانس شەفەق نیوز وت: دوێەشەو تەرم ژنیگ لەناو شوقەیگ لە وار سیتی لە ناوچەی دۆمیز باشوور دهۆک پەیا کریا.

وتیش: دویای لێکۆڵینەوە دەرکەفت ک قوربانیەگە تەڵاق دریاگە و تەمەنی هالە ٢٢ ساڵان، و گومان لە شوی ٣٥ ساڵانی کریا، و دویای مینەکردن، ئمڕوو دووشەممە، پۆلیس توێنست دەسگیری بکەێد وە ماوەیگ پەیمانەیی لە ٢٤ ساعەت زیاتر نەوی.

سڵێمان دیاری کرد ک شویەگە ئاشکرای تاوانەگەی کرد ک لەوەر گرفتەیلیگ کۆمەڵایەتی بویە، وتیش؛ تاوانبارەگە خاوەن چوار مناڵە.