شەفەق نیوز – گەرمیان
وەڕیەوبەر پۆلیس دارستان خانەقین سەروە ئیدارەی گەرمیان، رووژ دووشەممە، دووپات کرد لە کەفتن ماشینی وە وەر تەقەکردن وە نزیکەی 30 گولە لە شار کەلار لەناو ئیدارەی گەرمیان، جویر وەڵامیگ ئەرا بەیاننامەی فەرماندەیی پۆلیس پاریزگای دیالە کە رویداین رویداوەگە رەتەو کردۊد، و دووپات کرد کە رویداوەگە پەیوەندی وە ئەو فەرماندەییە کە ناوی بریاس نەیرێد، نە لە روی تایبەتمەندی ئیداری و نە لە روی شوین جوگرافی.
نەقیب هاوڕێ جەلیل، ئەرا پەیامنێر ئاژانس شەفەق نیوز وت، کە رویداوەگە ئیوارەی دۊەکە روی دا، دۊای گلەوخواردنی لە شوین کارەگەی ئەرا ماڵەگەی، کە کەسیگ دەمچەوبەسیاگ سوار ماتۆڕسکیلیگ هەڵسا وە تەقەکردن وە نزیکەی 30 گولە وەرەو ماشینەیلی لە وەردەم شوین نیشتەجیبۊنی لە شار کەلار.
ديارى کرد، کە رویداوەگە لەناو سنوورە ئیدارییەیل ئیدارەی گەرمیان روی داگە، و لە کەرت وەرپرسیاریەتی وەڕیەوبەرایەتی پۆلیس گەرمیان، و دیاری کرد کە پۆلیس دارستان خانەقین سەروە ئیدارەی گەرمیانە لە هەرێم کوردستان، و لە روی ئیدارییەو پەیوەندی وە فەرماندەیی پۆلیس پاریزگای دیالە نەیرێد.
جەلیل وتیش کە بەیاننامەی فەرماندەیی پۆلیس دیالە کە ئەو خەوەرەیلە رەتەو کرد کە لەباوەت رویداوەگە باس کریان، پەیوەندی وە رویداو تەقەکردنەگە نەیرێد، و دووپات کرد کە شوین رویداوەگە و ئەو لایەنە ئەمنییە کە وەدویاچگن ئەرای کەێد نیەچنە ناو تایبەتمەندی فەرماندەییەگە.
هەمیش وت کە ریکارەیل لێکۆڵینەوە وەردەوامن ئەرا ئاشکراکردن چوینیەتی رویداوەگە، و دەزگا ئەمنییە تایبەتمەنەیل ئەنجامەیل لێکۆڵینەوەگە و ئەو ریکارەیلە کە لەی باوەتەو گریانەسە وەر راگەیەنن.
فەرماندەیی پۆلیس پاریزگای دیالە بەیاننامەیگ دەرکردۊد، کە ئاژانس شەفەق نیوز ئاگاداری بۊ، لەناوی ئەو خەوەرەیلە رەتەو کرد کە لەباوەت تەقەلای تیرۆرکردن وەڕیەوبەر پۆلیس دارستان لە خانەقین بڵاو بۊنە، و دووپات کرد لە تومارنەکردن رویداویگ ئەمنی لەی جویرە، بیجگە لە نەۊین پێکهاتەیگ وەی ناوە لەناو میلاکەگەی یا لەناو فەرمانگە ئەمنییە پاڵپشتیکارەیلی.