شەفەق نیوز/ سەرچەوەیلیگ فەرمی و جەماوەری لە خانقين،  ئمڕوو پەنجشەممە،  باس کردن ک هیمان هێزەیل ئاسایش لە خانەقین، لە باوەتە ئەمنیەگە دیاری نییە، و تەنیا وە مەفرەزەی بی دەسەڵاتیگ وسیانە.

سەرچەوەیلە ئەرا ئاژانس شەفەق نیوز وتن؛ تاقە مەفرەزەیگ یا تاکە کەسەیلیگ لە ئاسایش خانەقین هانە وەرد هێزە ئەمنییەیلەی خانەقین،  ئەوەیش وەشیوەیگ ڕۆتینی و بی دەسەڵات و بی ئەرک، هەرچەن رێککەفتن ئەمنی وە گلەوخواردن ئاسایش ئەرا باوەت ئەمنی خانەقین هەس.

خەلکەگە داوای دەوریگ گەورەتر ئەرا ئاسایش کردن، و دووارە دیار بیەن تا نوای پەلامارەیل نوویگ لەبان مەدەنیەیلەی ناو و دەیشت خانەقین بگریەێد، و گلەوخواردن ئاسایش جۊر پەیامیگ دڵنیایی دانان ئەرا خەڵکەگە، و گلەوخواردن بڕوایی لەنانی هاووڵاتییەیلە و دەزگا ئەمنیەیلە.

هەرلیوا، وەرپرسیگ حکومەتی ناو خوەی ئاشکرا نەکرد، دووپات کرد ک دەسەلاتە ئەمنیەیلە گلەوخواردن ئاسایش یا گورجکردن دەوریان وەرجە هەڵبژاردن هاتگ لەوەر جەختەیل سیاسی دۊیرەو خەن.

وەرپرسەگە لە قسەیلی ئەرا ئاژانس شەفەق نیوز دووپات کرد ک تایبەتمەنی و پێکهاتەی خەڵک و نەتەوەی خانەقین بەشداریکردن ئاسایش لە باوەت ئەمنی خوازێد،  وکوردەیلە چەوەڕی گورجەوکردن رێککەفتنە ئەمنیەیلەی فیدراڵی و کوردی کەن.

لەلای خوەییش،  ئیبراهیم حەسەن وەرپرس راگەیانن یەکێتی نیشتمانی کوردستان ئەرا ئاژانس شەفەق نیوز وت : وەرگردن مووڵەتەیل فەرمی لە حکومەت فیدراڵی ئەرا گلەوخواردن ئاسایش ئەرا باوەتەیل ئەمنی لە خانەقین  بۊیە، و دیاری کرد ک  میکانزم جیوەجیکردن مووڵەتەگە هیمان هالە ناو رێککەفتن.

حەسەن باس ئەوەیش کرد ک ئاسایش هالە گەرد پۆلیس فیدراڵی لە ئەرکەیلیگ ئەمنی لەناو خانەقین،  وەلێ دەورەگری جارانی وەرنەگردیە.

لەلای خوەییش،  عەمید دیار شەوکەت وەڕێوبەر پۆلیس خانەقین ئەرا ئاژانس شەفەق نیوز وت: دەوریەیل ئاسایش وەیاوەری پۆلیس لە خانەقین نییە.

دیار شەوکەت لە قسەیلی ئەرا ئاژانس شەفەق نیوز دیاری کرد ک ئاسایش خانەقین لە دۊیای ساڵ ٢٠١٧ هالە دوو شۊن، یەکەمەگە لەلای مزگەفت حەفسە، و دۊیەمەگە هالە فلکەی کردنی، وەلێ وەبی هۊیچ دەسەڵاتیگ.