شەفەق نیوز ـ هەولێر

سەرۆک نێچیروان بارزانی، ئمڕوو دووشەممە، پیرۆزبایی لە یەکێتی زانایەیل ئایینی ئیسلامی کورستان کرد وەبوونەی یاد پەنجا وشەش ساڵەی دامەزرانی.

بارزانی لە بەیاننامەیگ رەسیە ئاژانس شەفەق نیوز، وت: "گەرمترین پیرۆزباییەیلم ئەرا   بەڕێز سەرۆک و ئەندامەیل نوسینگەی  جیوەجی یەکێتی زانایەیل ئایین ئیسلام کوردستان و گشت زانایەیل ئایینی ئیسلام پاک لە هەرێم ئاراستە کەم و هیوادارم سەرکەفتن و بەختەوەری وەدەس بارن."

وتیش: "وە سپاس و پێزانینیگ فرە ئەرا مێژووی خەبات زانایەیل ئایینی و یەکێتییەگەیان لە قۆناغ خەبات رزگاری و لە سەردەم شۆڕش، شان وە شان پێشمەرگە و کوڕ و دویەت گەلەگەمان، لەی یاد شکۆدارە یاد گیان پاک شەهیدەیل زانایەیل ئایینی و گشە شەهیدەیل رێباز رزگاریخواز کوردستان کەین، ئەوانەگ گیان خوەیان ئەرا نیشتمان وەخشی."

دیاریکرد: "زانایەیل ئایینی بەڕێز هەمیشە بنەمای پاراستن بەها مرۆیی و نیشتمانییەیل بوین و رۆڵیگ دیار لە قایمکردن بەهای، لێبوردەیی و پێکەوەژیان ناو پێکهاتەیل داشتیە، هەمیش لە بەرەنگاربوین توندڕەوی و پاراستن ئاشتی کۆمەڵایەتی رۆل داشتنە"، بارزانی لەی یادە دووپاتکرد  "کوردستان هەمیشە جویر خوەی، وڵات پێکەوەژیان ئاشتیانە مینێد".