شه‌فه‌ق نيوز/ كۆمه‌ڵه‌ى كورده‌يل فه‌يلى له هه‌رێم كوردستان، بڕيار هه‌ڵوه‌شاننه‌وه‌ى ئاهه‌نگ جه‌ژنه‌يل له‌داڵگبوين و سه‌رساڵ زايينى دا له‌وه‌ر ئه‌وه‌گ ريككه‌فته وه‌ل قوربانيه‌يل خوه‌ينيشانداينه‌يل له ناوڕاس و باشوور وڵاته‌گه.
له‌و باوه‌ته‌و، سامى فه‌يلى سه‌رۆك كۆمه‌ڵه‌گه له به‌ياننامه‌يگ ئه‌را شه‌فه‌ق نيوز وت: كۆمه‌ڵه‌گه بڕيار هه‌ڵوه‌شاننه‌وه‌ى گشت شيوه‌يل ئاهه‌نگسازييگ سه‌رساڵ دا وه بوونه‌ى ئه‌و بارودوخه ك ئيسه هاته‌سه تويش عراق.
فه‌يلى وت: سه‌دان شه‌هيد و هه‌زاران زه‌خمدار له خوه‌ينيشانداينه‌يل وه‌رده‌وام كه‌فته‌سه‌و له ماوه‌ى نزيكه‌ى دو مانگ ك يه‌يش شۆك گه‌ورايگه ئه‌رامان و ئيمه‌يش هاوكاريم وه‌ل كه‌س و كار قوربانيه‌يل له‌شاره‌يل جياجياى عراقى و داوايش كرد قه‌ره‌بوو زه‌ره‌دمه‌نه‌يل و جيوه‌جێ داواكاريه‌يل ره‌واى خوه‌ينيشانده‌ره‌يل بكريه‌ێد.